Այլընտրանքային էլեկտրաէներգիայի արտադրությունը մեր տարածաշրջանի զարգացման առաջնահերթ ուղղություններից է, եւ մենք հետեւողականորեն առաջ ենք տանում այդ քաղաքականությունը։ Այս մասին հուլիսի 7-ի մամուլի ասուլիսում ասաց Գեղարքունիքի մարզպետ Գնել Սանոսյանը։
Նա, մասնավորապես, ներկայացրեց մարզում արտադրվող այլընտրանքային էներգիայի ծավալները, ինչպես նաեւ դրա զարգացման հեռանկարները։ «Ներկա պահին այլընտրանքային էներգիայի արտադրության համար մենք փոխել ենք 387 հա հողերի կատեգորիան, եւ դրանցից 36 հա-ի վրա արդեն շինարարություն է կատարվում։ Շինաշխատանքները սկսվում են Մեծ Մասրիկում՝ 132 հեկտարի վրա։ Շինաշխատանքների ավարտից հետո «Մեծ Մասրիկ» արեւային ֆոտովոլտային կայանում կարտադրվի 53 մեգավատ/ժամ էլեկտրաէներգիա։ Ներկա պահին 16 մվտ էլեկտրաէներգիա արտադրվում է խոշորացված Շողակաթ համայնքի կայաններում, որոնք կառուցվել են վերջին երեք տարում»,- տեղեկացրել է մարզպետը։
Ընդ որում՝ նա նշել է, որ մյուս կայանների շինարարության ավարտից հետո Շողակաթի արեւային կայաններն ընդհանուր առմամբ կարտադրեն 36 մվտ էլեկտրաէներգիա։
Սանոսյանի խոսքով՝ ներդրումները «Շողակաթ» արեւային կայանի շինարարությունում կազմել են մոտ 15 մլրդ դրամ։ «Շինարարության ընթացքում ստեղծվել է մոտ 700 աշխատատեղ, իսկ յուրաքանչյուր կայանի աշխատանքի դեպքում կստեղծվի մինչեւ 10 աշխատատեղ»,- եզրափակել է մարզպետը։