Ուրբաթ «Միացյալ ազգային շարժում» ընդդիմադիր կուսակցության ակտիվիստները կազմակերպել են բողոքի ցույց Թբիլիսիում Վրաստանի վարչապետ Իրակլի Ղարիբաշվիլիի տան մոտ. նրանք պահանջել են վարչապետի հրաժարականը, հաղորդում է Sputnik-Գրուզիա-ն:
«Միացյալ ազգային շարժում» ընդդիմադիր կուսակցության ակտիվիստները կազմակերպել են բողոքի ցույց Թբիլիսիում Վրաստանի վարչապետ Իրակլի Ղարիբաշվիլիի տան մոտ»,-գրում է գործակալությունը:
Ակցիայի մասնակիցները համարում են, որ Ղարիբաշվիլիին է պատասխանատու հուլիսի 5-ին տեղի ունեցած իրադարձությունների համար, երբ Վրաստանի մայրաքաղաքում տեղի են ունեցել անկարգություններ՝ լրագրողին ծեծի ենթարկելով:
Պարբերականի տվյալներով՝ ոստիկանությունը մի քանի մարդու դուրս է բերել այդ տարածքից՝ խանգարելով նրանց գրառումներ կատարել ասֆալտին եւ պատերին: Փոքրաթիվ մասնակիցներով ակցիան կարճ ժամանակ անց ավարտվել է: Տան տարածքում, որտեղ ապրում է վարչապետը, ուժգնացված հսկողություն է իրականացվում:
«Թբիլիսի փրայդ» ԼԳԲՏ համայնքի կազմակերպությունը պլանավորել էր քայլերթ Թբիլիսիում հուլիսի 5-ին: Դրա դեմ են ներկայացել ավանդական արժեքների պաշտպանները, որոնք վաղ առավոտյան սկսել էին հավաքվել Ռուստավելի պողոտայում: Ավելի ուշ նրանք տեղափոխվել են դեպի խորհրդարանի շենք, որտեղ առավել ագրեսիվ տրամադրված մասնակիցները սկսել են հարձակվել լրագրողների վրա՝ մեղադրելով նրանց սեռական փոքրամասնությունների ներկայացուցիչներին աջակցելու մեջ: Տուժել է ԶԼՄ-ների ավելի քան 50 ներկայացուցիչ: Լրագրողներին ծեծելու գործով ոստիկանությունը բերման է ենթարկել 23 մարդու:
