Դատը հետաձգվեց՝ նկատի ունենալով, որ դատարանն ուներ նաեւ այլ նիստեր նշանակված, եւ նշանակվեց օգոստոսի 30-ին ժամը 16.30-ին: Այս մասին այսօր՝ հուլիսի 30-ին, դատական նիստից հետո լրագրողների հետ զրույցում նշեց ՀՅԴ անդամ, «Հայաստան» դաշինքից պատգամավոր ընտրված Արծվիկ Մինասյանը:
Նշենք, որ Երևան քաղաքի առաջին ատյանի ընդհանուր իրավասության դատարանի «Կենտրոն» նստավայրում քննվում էր Հակոբ Մարտիրոսյանի և Արծվիկ Մինասյանի հայցն ընդդեմ Գլխավոր դատախազության անգործության:
Պահանջվում է քրեական գործ հարուցել Նիկոլ Փաշինյանի նկատմամբ՝ Քրեական օրենսգրքի 299-րդ հոդվածով նախատեսված պետական դավաճանության առերևույթ հանցագործության հատկանիշներով:
«Կարծում եմ՝ ուղիղ եթերում մարդիկ տեսան, թե որքան հիմնավոր է հանցագործության մասին մեր հաղորդումը եղել: Պարոն Մարտիրոսյանն անդրադարձավ հաղորդման երեւի մոտ 10 տոկոսին, ընդհանուր գծերը ներկայացրեց:
Հարցն այն է, որ 32 էջի բաղկացած հանցագործության մասին հաղորդումը , որը ներառում է 3 տասնյակից ավելի կոնկրետ փաստեր եւ դրանց վրա հիմնված համակարգային վերլուծություն, եւ այդ վերլուծությունը անկողմնակալ հետեւողի մոտ ողջամիտ հետեւության է բերում, որ իսկապես գործ ունենք պետական դավաճանության հետ, որն արտահյայտվել է մեր թշնամիներին օգնելուն ուղղված գործողությունների տեսքով՝ ի դեմս Նիկոլ Փաշինյանի եւ բազմաթիվ այլ պետական պաշտոնյաների, ինչպես նաեւ պաշտոնական լիազորությունների անցում, որի արդյունքում Հայաստանը, հայ ժողովուրդը, Արցախը հայտնվել են նման անդառնալի կորուստների առջեւ»-ասաց Արծվիկ Մինասյանը:
Նրա խոսքով, դատախազությունը ցուցաբերել է անգործություն, որովհետեւ ըստ քրեական դատավարության օրենսգրքի 181-րդ հոդվածի դատախազությունը եւ նախաքննական մարմինները պարտավոր էին կամ քրգործ հարուցել, կամ մերժել, կամ ուղարկել ըստ ենթակայության:
«Դրանցից որեւէ մեկը չի արվել: Ավելին, աղճատելով բողոքի տրամաբանությունը, համակարգվածությունը, դրանից առանձնացնելով ընդամենը 2 դրվագ, դատախազությունը փորձել է պատասխանել, թե իբր կցել է այլ քրեական գործի շրջանակներում քննությանը, մինչդեռ մեր պահանջը չի եղել այդ դրվագներով որեւէ կոնկրետ այլ քրգործի շրջանակներում քննություն իրականացնելը: Այլ կոնկրետ փաստով մեղադրանք առաջադրելու պահանջ ենք դրել՝ պետական դավաճանություն, պետական լիազորությունների անցում: Ես վստահ եմ, որ այս քրգործը հարուցելու դեպքում ի հայտ կգային նոր փաստեր, որով Հայաստանի դեմ ագրեսիվ պատերազմի վարման հարցում այս անձանց մեղավորությունը նույնպես կհաստատվեր:
Հուսանք, որ ի վերջո, այդ քրեական գործը կհարուցվի»,-ասաց Մինասյանը:
