ԱՄՆ վարչակազմը պետք է գիտակցի, որ ոչնչի չի հասնի՝ հետեւելով նախկին նախագահ Դոնալդ Թրամփի մտածելակերպին: Այս մասին հայտարարել է Իրանի ԱԳՆ ներկայացուցիչ Սաիդ Խաթիբզադեն, փոխանցում է Tasnim-ը:
Նրա խոսքով՝ ԱՄՆ-ն պետք է փոխի իր մտածելակերպը եւ հաշվի առնի տեղերում առկա իրողությունները:
«Նրանք (ամերիկացիները) գիտեն, եւ մենք նույնպես գիտենք, որ առավելագույն ճնշման քաղաքականությունը տապալված է, եւ Իրանը չի ընդունի ԳՀՀԾ-ից պակաս որեւէ բան»:
Պատասխանելով Վիեննայում բանակցությունների վերսկսման մասին հարցին՝ Խաթիբզադեն ասել է, որ Իրանը երբեք չի հրաժարվել բանակցություններից: Նա պարզաբանել է, որ նախագահ Էբրահիմ Ռաիսիի վարչակազմի՝ իշխանության գալուց հետո Իրանն իշխանության ժողովրդավարական փոխանցման փուլում է՝ նշելով, որ ԳՀՀԾ-ի շուրջ բանակցություններում ներգրավված գործադիր խմբերն այդ գործընթացում կփոխվեն:
Նրա խոսքով՝ Ռաիսին հասկացրել է, որ Իրանի դեմ պատժամիջոցները պետք է հանվեն:
Ապրիլից Իրանի եւ P4+1 խմբի ներկայացուցիչները՝ Ֆրանսիան, Մեծ Բրիտանիան, Գերմանիան, Ռուսաստանը եւ Չինաստանը, բանակցություններ են վարում Վիեննայում, որոնք ուղղված են ԳՀՀԾ-ի ակտիվացմանը եւ ԱՄՆ-ի վերադարձին դրան:
