Ազգային ժողովի շենքում լրագրողների աշխատանքը կհամակարգվի: Այս մասին հայտարարեց Ազգային ժողովի նախագահ Ալեն Սիմոնյանը՝ արտահերթ ելույթը նվիրելով նախորդ խոսնակ, «Հայաստան» դաշինքի ներկայացուցիչ Գեղամ Մանուկյանին, ով խոսում էր լրատվամիջոցների վրա իշխանությունների ճնշումների մասին:
«Հավանաբար, մենք պետք է շնորհակալություն հայտնենք լրատվամիջոցներին՝ պատերազմի օրերին պետության հետ համագործակցության համար»,- ծաղրանքով սկսեց Սիմոնյանը` արձագանքելով Մանուկյանի նշած համագործակցությանը:
«Ես զարմանում եմ, որ թվում է, թե պետք է երախտապարտ լինել, որ պատերազմի ժամանակ աշխատանք կար, եւ որ իշխանություններն ինչ ասում, այն էլ անում էին: Ուրիշ ինչպե՞ս: Թույլ տվեք խոսեմ»,- ասաց Սիմոնյանը՝ ի պատասխան տեղից հնչած նկատողություններին:
«Մինչ դուք ելույթ էիք ունենում, ես գրառումներ էի կատարում եւ մտածում, որ տեղը չի հերիքի՝ այնքան բան կա հակադարձելու: Ինչ վերաբերում է հեռուստաալիքներին. Հայաստանում երբեք այսքան շատ ընդդիմադիր ալիքներ չեն եղել»,- ասաց Սիմոնյանը՝ ակնարկելով «Երկիր Մեդիա»-ի կողմից լիցենզիայի ոչ այդքան ազնիվ ստացմանը եւ ընտրովի մոտեցումը հյուրերին եթեր հրավիրելիս:
Խորհրդարանում ԶԼՄ-ների ազատության մասով Սիմոնյանը հետաքրքրվեց՝ արդյո՞ք Անգլիայում` ժողովրդավարության այդ բաստիոնում, լրագրողը կարող է հայտնվել պատգամավորի գրասենյակում, կամ հետապնդել նրան միջանցքում: «Սա բացառված է: Նման բան չկա ոչ մի երկրում: Այն, ինչ դուք նկարագրում եք, գրեթե ոչ մի այլ տեղ աշխարհում չկա: Այն երկրներում, որոնք ավելի փակ են, լրագրողներին ընդհանրապես չեն թողնում խորհրդարանի շեմին: Էլ չեմ խոսում այն մասին, որ հեղափոխությունից հետո խոսքի ազատության կտրուկ աճը հանգեցրեց նրան, որ նորմալ վերլուծաբանները կատարվածը համեմատում են լկտիության հետ:
Այսինքն ՝ ոմանք խոսքի ազատությունը շփոթել են լկտիության հետ»,- ասաց Սիմոնյանը՝ առաջարկելով ուսումնասիրել ընդդիմադիր լրատվամիջոցների վերնագրերը: «Այո, եւ դուք, լրագրող աշխատելով, վիրավորանքները չէիք խնայում սոցցանցերում: Ձեր օրինակին են բազմաթիվ լրագրողներ էին հետեւում: Այս սենյակում ներկա առնվազն երկու նախկին լրագրող թույլ են տվել իրենց վիրավորանքներ հասցնել սոցիալական ցանցերում: Իսկ հետո մենք «ատելություն տարածեցինք»»,- հեգնանքով ասաց Սիմոնյանը:
Նրա խոսքով՝ սխալ է ամեն ինչ ներկայացնել այնպես, կարծես լրագրողներին մտադիր են ինչ -որ անկյունում փակել:
«Նրանք կկարողանան լուսաբանել, հարցազրույցներ անել: Բայց, ներեցեք, այո, նրանք չեն կարողանա մտնել պատգամավորի գրասենյակ, միջանցքով վազել պատգամավորների հետեւից, քանի որ դա անհարգալից վերաբերմունք է ինչպես լրագրողի, այնպես էլ պատգամավորի նկատմամբ»,- ասաց Սիմոնյանը՝ վստահեցնելով, որ երկրի բնակչության մեծ մասը դժգոհ է լրագրողներից: Դիմելով բոլոր լրագրողներին՝ Սիմոնյանը հորդորեց զերծ մնալ սոցցանցերում քաղաքական ու հասարակական գործիչներին վիրավորելուց: Սիմոնյանը միաժամանակ վստահեցրեց, որ լրատվամիջոցների 80 տոկոսը պատկանում է ընդդիմությանը, եւ վիրավորանքներով համեմված գործունեությունը չի անցնի: