Աֆղանստանի բնակիչները կարող են զանգվածային սովի ենթարկվել՝ «Թալիբան» արմատական շարժման զինյալների կողմից իշխանությունը զավթելու, երաշտի եւ կորոնավիրուսի համավարակի պատճառով: Այդ մասին հայտնում է Reuters-ը՝ հղում անելով ՄԱԿ-ի Պարենի համաշխարհային ծրագրի գործադիր տնօրեն Դեւիդ Բիզլիին:
«Կատարյալ փոթորիկ է սպասվում՝ երկար տարիների երաշտի, հակամարտությունների ու տնտեսական վատթարացման պատճառով, որը խորացել է COVID-ով: Սովից մահանալու վտանգի տակ գտնվող մարդկանց թիվը հասել է 14 միլիոնի»,- ասել է նա:
Բիզլին հավելել է, որ եթե երկրում իրավիճակը վատթարանա, Աֆղանստանի բնակչության համար «երկրի վրա իսկական դժոխք» է սպասվում:
ՄԱԿ-ի ներկայացուցչի խոսքով, համաշխարհային քաղաքական գործիչները պետք է արագ գործեն, քանի որ Աֆղանստանը արտաքին օգնության կարիք ունի: Մարդասիրական աղետը կանխելու համար մինչեւ սեպտեմբեր երկիր պետք է ուղարկվի առնվազն 200 միլիոն դոլար: Բիզլին հույս է հայտնել, որ աֆղանցիներին օգնելու համար այդ միջոցները կարող են հատկացնել ԱՄՆ-ի, Կատարի եւ Պարսից ծոցի այլ արաբական պետությունների իշխանությունները։
Օգոստոսի 15-ին թալիբները հայտարարել են Աֆղանստանում իշխանությունը զավթելու մասին: Այժմ նրանք ամբողջությամբ վերահսկում են երկրի մայրաքաղաք Քաբուլը եւ այլ քաղաքներ: Երկրից հեռանալու միակ ճանապարհը դեռ մնում է Քաբուլի օդանավակայանը, որի միջոցով այլ նահանգների իշխանությունները տարհանում են իրենց քաղաքացիներին: Իրենք՝ աֆղանցիները, նույնպես փորձում են նստել ինքնաթիռներ, սակայն գրոհայինները փակել են օդանավակայանի ճանապարհը, եւ այնտեղ թույլատրվում է միայն օտարերկրացիներին: «Թալիբան» շարժման ներկայացուցիչ Զաբիուլլահ Մուջահիդը հայտարարել է, որ օգոստոսի 31-ից հետո անհնար կլինի հեռանալ Աֆղանստանից:
