Եվրամիությունը պետք է փոխգործակցի թալիբների հետ, սակայն չի շտապի պաշտոնապես ճանաչել նրանց որպես Աֆղանստանի նոր ղեկավարներ, չորեքշաբթի ասել է Եվրամիության բարձրաստիճան պաշտոնյան: Այս մասին հայտարարել է Եվրոպական արտաքին քաղաքական ծառայության եվրոպական եւ կենտրոնասիական վարչության պետ Գունար Վիգանդը, փոխանցել է Reuters-ը:
Նրա խոսքով՝ հարաբերություններ կհաստատվեն միայն այն դեպքում, եթե թալիբները կատարեն մի շարք պայմաններ, այդ թվում՝ հարգեն մարդու իրավունքները եւ չխոչընդոտեն մարդասիրական կազմակերպությունների աշխատակիցների անարգել մուտքը:
«Անդամ երկրների (ԵՄ) եւ G7-ի մոտ կասկածներ չկան՝ մենք պետք է փոխգործակցենք թալիբների հետ, շփվենք թալիբների հետ, ազդենք թալիբների վրա, պետք է օգտագործենք մեր ունեցած լծակները», - ասել է նա: «Սակայն մենք չենք շտապի ճանաչել այս նոր կազմավորումը եւ պաշտոնական հարաբերություններ հաստատել», - ասել է նա Եվրախորհրդարանի անդամներին:
Վիգանդը նշել է, որ անհասկանալի է՝ արդյո՞ք թալիբները կկարողանան արդյունավետ կառավարել երկիրը, սակայն ԵՄ-ի համար պաշտոնական հարաբերությունների հիմնական պայմանը կլինի ներկայացուցչական եւ ներառական անցումային կառավարության ստեղծումը: Նա հայտնել է, որ «Թալիբան» շարժման ճանաչման պայմաններն են՝ թույլատրել աֆղանստանցիներին ազատորեն լքել երկիրը, խուսափել օտարերկրյա ուժերի կամ նախկին կառավարության հետ կապ ունեցող անձանց նկատմամբ վրեժխնդրությունից եւ Աֆղանստանը չդարձնել ահաբեկիչների ապաստան:
Նա խոսքով՝ պետք է գնահատականներ տրվեն, թե ինչն էր սխալ Աֆղանստանի հետ Արեւմուտքի 20-ամյա փոխազդեցության մեջ՝ նկատի ունենալով Քաբուլից քաղաքացիական բնակչության եւ օտարերկրյա ուժերի քաոսային տարհանումն այն բանից հետո, երբ թալիբները ներխուժեցին մայրաքաղաք: «Մենք պետք է գնահատենք պատճառները, որոնք հնարավոր են դարձրել նման ճգնաժամը», - ասել է Վիգանդը:
