Պակիստանի օգնությունը պետք չի եղել «Թալիբան»-ին Աֆղանստանի Փանջշեր նահանգը գրավելու համար, որը թալիբների դեմ դիմադրության կենտրոնն էր, հայտարարել է Աֆղանստանի ժամանակավոր կառավարությունում շարժման կողմից նշանակված արտգործնախարար Ամիր Խան Մոտակին, հայտնում է TOLO News-ը:
«Եթե մենք առանց Պակիստանի օգնության վերահսկողության տակ ենք վերցրել 33 նահանգներ, ապա մեր ինչին էր պետք Պակիստանի օգնությունը միայն Փանջշերի երկու կամ երեք շրջանների համար: Սա ոչ այլ ինչ է, քան քարոզչություն»,- ասել է Մոտակին:
Ավելի վաղ հնդկական Pioneer թերթը հաղորդել էր, որ Պակիստանի ռազմական ավիացիան եւ հատուկ ջոկատայինները աջակցել են թալիբներին Փանջշերը գրավելու գործողությունում: Այնուհետեւ Պակիստանի ԱԳՆ խոսնակ Ասիմ Իֆտիխարը հերքել էր թալիբների կողմից նահանգի գրավմանը պակիստանցի զինվորականների մասնակցության մասին տեղեկությունները:
