Ոստիկանության անօրինական գործողությունների արդյունքում ինձ մարմնական վնասվածք հասցնելու դեպքի առթիվ քրեական գործ դեռ հարուցված չէ: Այս մասին հոկտեմբերի 8-ին լրագրողների հետ հանդիպման ժամանակ ասաց «Երկիր ծիրանի» կուսակցության նախագահ Զարուհի Փոստանջյանը:
Նա քննչական մարմնի եւ դատախազների անգործությունն անընդունելի է համարեց:
Քաղաքական գործիչը վստահություն հայտնեց, որ նրանք, ովքեր սատարում են պետական դավաճանություն իրականացնողներին սպասում է «Նեմեզից» օպերացիայի զոհերի ճակատագրին:
Փոստանջյանը հայտարարեց իրավական ու քաղաքական պայքարը շարունակելու պատրաստակամության մասին:
Հիշեցնենք, որ սեպտեմբերի 21-ի առավոտյան «Եռաբլուրի» մոտ ոստիկանական համազգեստով մարդիկ ուժով, մարմնական վնասվածքներ հասցնելով բերման ենթարկեցին Զարուհի Փոստանջյանին:
Կուսակցության ղեկավարի խոսքով` Փաշինյանն անընդհատ արդարանում է, մինչդեռ պատվիրատուրներն իրենից այդքան էլ գոհ չեն, քանի որ նա իր գործն այդքան էլ լավ չի անում (խոսքը Թուրանի միջանցքի բացման մասին է)` չնայած ամեն ինչ չէ, որ կախված է միայն նրանից:
«Գործընթացին միջամտել են այլ արտաքին խաղացողներ, բայց պատվիրատուներին դա չի հետաքրքրում: Ադրբեջանը, իր հերթին, նույնպես գերագնահատում է իր հնարավորությունները, քանի որ հակաթուրանական կոալիցիայի անխուսափելի ստեղծումը սպառնում է ոչնչացնել այս արհեստական կազմավորումը: Մենք գտնվում ենք լուրջ աշխարհաքաղաքական իրադարձությունների նախաշեմին, որոնք կարող են լայնածավալ ռազմական գործողություններ ներառել: Լաչինում զորավարժություններն ուղղված են Հայաստանի եւ Արցախի դեմ: Ինչո՞վ ենք դրան արձագանքելու: Գործող իշխանությունները ոչինչ չեն անի. հակառակը, դռները կբացեն եւ կհրավիրեն մեր տները»,- ասաց Փոստանջյանը:
Նրա կարծիքով` Փաշինյանը պետք է երկար ժամանակ «համապատասխան տեղում» լիներ. «Մեկնաբանելով նրա խոսքերը` կարող եմ ասել, որ Շուշիում լուրջ ներդրումներ են արվել, քաղաքին հատուկ վերաբերմունք էր ցուցաբերվում: Ինչո՞ւ էր Նիկոլը երգում, պարում եւ զվարճանում Շուշիում, իսկ հետո հանձնվեց եւ ասաց, որ այն դժբախտ եւ մռայլ քաղաք է: Շուշին ռազմավարական նշանակություն ունի, քանի որ այն Արցախի բանալին է, եւ առանց դրա Հայաստանի սուբյեկտիվությունը խաթարված է: Հենց այդ քաղաքականությունն էլ վարվում է: Եթե նախկինները մեղադրվում էին կոռուպցիայի մեջ, ապա այս անձը եւ նրա համախոհները պետական դավաճանություն գործեցին: Հասարակությունը նոր մանիպուլյացիաների չպետք է ենթարկվի: Նրան նոր ղեկավարություն է անհրաժեշտ, այն էլ` ոչ թե կուսակցական պատկանելության, այլ ազգային համաձայնության հովանու ներքո, ինչը կօգնի երկիրը դուրս բերել ստեղծված իրավիճակից: Շատերը չեն վստահում նաեւ նախկիններին: Բացի այդ, նրանք ցույց տվեցին, որ ի վիճակի չեն վերջ դնել պետականության փլուզմանը: Ժողովուրդն առաջնորդների է սպասում: Նրանք չկան: Այդպիսիք կարող են դառնալ քաղաքականապես հասուն մարդիկ: Խորհրդարանում գործընթացները առաջնորդություն չեն. չկան ուղեկցող գործողություններ, փողոցային պրոցեսներ»,- եզրափակեց նա:
