Վերջին օրերին նկատեցի իշխանության ներկայացուցիչները սկսել են ներկայացնել պատվաստման իրականում բավականին վատ պատկերը՝ սլաքները փորձելով ուղղել դեպի ընդդիմություն, նման կերպով փորձում են հերթական անգամ պատասխանատվությունից խուսափել: Այս մասին այսօր՝ հոկտեմբերի 11-ին, ԱԺ-ում լրագրողների հետ ճապազրույցի ժամանակ նշեց «Հայաստան» խմբակցության պատգամավոր Արամ Վարդեւանյանը:
«Մենք Սահմանադրական դատարան ներկայացրել ենք դիմում առողջապահության նախարարի հայտնի հրամանի հետ կապված այն մասով, որ սոցիալ-տնտեսական պայմանները, որոնք մենք ունենք հիմա, չեն ենթադրում նման չափով ծախսային բեռ մեր համաքաղաքացիների վր դնելը: Երբ պահանջում են 14 օրը մեկ ՊՇՌ թեստ հանձնել, դա ինքնին կարող է լինել ողջամիտ: Խնդիրն այն է, որ սա անում են մարդկանց հաշվին: Սա նորմալ չէ: Եվրոպական երկրներում եւս նման մոդելներ ներդրվել է, մեկ կարեւոր տարբերությամբ՝ պետությունն է այդ ծախսը կատարում:
Այս սոցիալ-տնտեսական պայմաններում նորմալ չէ, որ մարդկանց հարկադրես կամ գն քո աշխատավարձի մի մեծ զանգվածը տուր ՊՇՏ հետազոտման համար, կամ որպես այլընտրանք գնա եւ պատվաստվիր: Սա դառնում է հարկադրանք:
Մենք նաեւ ՍԴ-ին միջնորդել էինք, որ առողջապահության նախարարի հրամանը կասեցվի: Իմ տպավորությունն այն է, որ պետական պաշտոնյաների հանրային հայտարարություններով որոշակի ազդակներ տալիս կամ ճնշման փորձեր կատարում, կամ գուցե ուզում են վախեցնել: Կտեսնենք արդյունքն ինչպիսին կլինի»,-ասաց նա:
Վարդեւանյանը հայտարարեց, որ իրենք կողմ են պատվաստմանը. «Դա միակ միջոցն է կորոնավիրուսի համավարակի դեմ պայքարի: Այո, այն ունի իր որոշակի բարդությունները, բայց համաշխարհային փորձը ցույց է տալիս, որ այսօր ճիշտը պատվաստվելն է: Այստեղ հարց է ծագում, այդ ինչպես է ստացվում, որ խաղաղության օրակարգ ձեւավորելու, թշնամուն թշնամի չասելու մանդատ ստացած իշխանությունը չի կարողանում այդ նույն վստահությունը վայելել պատվաստման հետ կապված հարցում: Այսինքն այն վստահության մակարդակը, որ փորձում են ներկայացնել, չունեն:
Երկրորդն այն է, որ հանրության հետ կոմունիկացիոն ճիշտ ռազմավարություն չկա: Այսինքն պետք է հանրությանբը ներկայացնել՝ ինչի համար է կարեւոր պատվաստվելը: Օրինակ, Դանիայում նման տեսակի անհամաչափ, ոչ իրավաչափ հակասահմանադրական միջոցներով մարդկանց չեն ստիպել, որ պատվաստվեն, այլ ճիշտ կոմունիկացիա են իրականացրել: Կարողացել են հավաքել բազան եւ յուրաքանչյուրին պարբերաբար SMS հաղորդագրություններով շփվել են, փորձել են ներկայացնել, թե ինչի համար է կարեւոր պատվաստվելը: Իսկ մեզ մոտ արդեն մարդկանց հետ խոսում են ձերբակալելու, կալանավորելու լեզվով: Սա՞ է նորմալը:
Մենք կողմ ենք պատվաստմանը, բայց պատվաստվելը պետք է յինի յուրաքնաչյուրի գիտակցված որոշումը:
Ես վերջերս հայտարարեցի, որ Եվրոպայում չկա մի երկիր, որտեղ պատվաստումը լինի հարկադրանքի ճանապարհով: Թեստ չնչին գումար է: Եթե դուք թեստի իրական ծագման հաստատուն ծախսը բացահայտեք, կհասկանաք, որ այն շատ չնչին արժեք ունի»,-ընդգծեց նա:
Ընդդիմադիր պատգամավորը նկատեց, որ բժշկական համակարգի մահճակալային ֆոնդն իսկապես սպառվում է. «Մենք մինչեւ հիմա չենք կարողանում ունենք Պֆայզեր պատվաստանյութը, որովհետեւ անհրաժեշտ սառնարանային համակարգը չկա: ՄԻնչեւ հիմա հնարավոր չէ՞ր այս հարցը լուծել: Կամ պետությունը նաեւ պետություն է նրանով, որ պետք է այս կարճ ժամանակահատվածում ստեղծեր նոր հիվանդանոցներ, մահճակալային ֆոնդը ավելացներ: Թող պարգեւատրումները կանգնեցնեին եւ հիվանդանոցի պրոյեկտ սկսեին»:
Անդրադառնալով Աշխատանքային օրեսնսգքրում հնարավոր փոփոխություններին, որով, ըստ էության, օրինականացվելու է պատվաստումների հարկադրանքը, Վարդեւանյանն ասաց. «Գործատու-աշխատող հարաբերությունների բալանսը չի կարող խախտվել: Այդ բալանսից մեկն էլ այն է, որ գործատուն չի կարող տեխնիկական պատճառով աշխատողին աշխատանքից ազատել: Գործատուն կարող է ներկայացնել պահանջներ, որոնք նախատեսված են օրենքով:
Եթե ասում ես՝ իշխանությունը պատկանում է ժողովրդին, ո՞նց ես ասում՝ կձերբակալենք, կկալանավորենք, մի հատ թող փորձի չպատվաստվել: Ասել, որ եթե չես պատվաստվել, քեզ աշխատանքից պետք է հանել ու ամեն մեկդ գլխով պատասխան եք տալու, սա արդեն մուտք է գործում քրեաիրավական տիրույթ: Դատախազությունը պետք է դիտարկի այդ հայտարարության քրեաիրավական առնչության հարցը»:
