Ներքին գործերի նախարարությունը որոշել է փոխել Ռուսաստանում օտարերկրացիների գտնվելու օրինական ռեժիմը եւ միգրացիոն երեք ռեժիմ ներդնել՝ կարճաժամկետ, երկարաժամկետ եւ մշտական բնակություն, ասել է ներքին գործերի նախարարի առաջին տեղակալ Ալեքսանդր Գորովոյը, փոխանցել է Ինտերֆաքս-ը:
Երկարաժամկետ կացության ռեժիմը ենթադրում է կես տարվա ընթացքում օտարերկրացու՝ Ռուսաստանում ավելի քան 90 օր մնալու իրավունք: «Այն կփոխարինի ժամանակավոր կացության թույլտվությանը», - պարզաբանել է Գորովոյը:
Կարճաժամկետ կացության ռեժիմը կտրամադրվի օտարերկրացուն` երկիր մուտքի օրվանից մինչեւ 90 օր ժամկետով: Եթե օտարերկրացին ցանկանում է ավելի երկար մնալ Ռուսաստանում, ապա նրանից կպահանջվի 90 օրվա ընթացքում երկարաժամկետ կեցության թույլտվություն ստանալ կամ հեռանալ:
Մշտական կացության ռեժիմը գործելու է անժամկետ, այն ենթադրում է կացության թույլտվութան ստացում եւ քաղաքացիություն ստանալու հնարավորություն է ստեղծում, հավելել է ՆԳՆ ղեկավարի առաջին տեղակալը:
Ռուսաստանում երկար մնալու իրավունք ստանալու համար օտարերկրացին պետք է ստանա պետական տեղեկատվական համակարգում թվային պրոֆիլ եւ տեղեկատվության էլեկտրոնային կրիչով փաստաթուղթ, ասել է Գորովոյը:
«Մեկ կարգավիճակից մյուսին անցնելու համար անհրաժեշտ մեխանիզմներ կնախատեսվեն՝ առանց Ռուսաստանի Դաշնությունից դուրս գալու մուտքի նպատակը փոխելու համար», - ասել է ՆԳՆ ղեկավարի տեղակալը:
Նախարարությունը ծրագրում է նաեւ համապարփակ բարեփոխումներ կատարել մշտական բնակության ինստիտուտում: Մասնավորապես, օտարերկրացուն մշտական բնակության իրավունք կտրամադրի տարածաշրջանի միջգերատեսչական հանձնաժողովը:
Բացի այդ, ՆԳՆ-ը կփոխի մոտեցումը օտարերկրացիներին Ռուսաստանում սովորելու հնարավորություն տալու հարցում: «Շրջանավարտների առաջնահերթ կատեգորիաներին պատկանող օտարերկրացիների համար Ռուսաստանի քաղաքացիություն ստանալու պարզեցված ընթացակարգ կգործի», - ասաց Գորովոյը:
Բարեփոխումը կազդի նաեւ օտարերկրացիներին աշխատանքի ընդունելու կարգի վրա: Ներքին գործերի նախարարությունն առաջարկել է ներդնել օտարերկրյա աշխատուժ ներգրավող գործատուների գրանցամատյան, իսկ թղթային թույլտվությունները փոխարինել թվային պրոֆիլի էլեկտրոնային գրառումներով: Գրանցամատյանի գործատուները կկարողանան ցանկացած օտարերկրացու, որը ներառված է օտարերկրյա աշխատողների պետական գրանցամատյանում, ընդունել հաստատված թափուր աշխատատեղի համար», - հայտարարել է փոխնախարարը:
Գորովոյը կարծում է, որ անհրաժեշտ է օպտիմալացնել նաեւ արտասահմանցիների համար հարկային ռեժիմները՝ հաշվի առնելով զբաղվածության ձեւերը եւ ԵԱՏՄ երկրների քաղաքացիների կարգավիճակի առանձնահատկությունները: «Հարկի կանոնավոր վճարումը կլինի իրական աշխատանքային գործունեության հաստատում եւ Ռուսաստանում մնալու իրավունքը պահպանելու պարտադիր պայման կդառնա»,- ընդգծել է նա:
ՆԳՆ-ն պատրաստվում է նաեւ թվային հարթակ ստեղծել միգրացիոն գործընթացների եւ աշխատանքային ռեսուրսների համար, որպեսզի այդ տեղեկատվությունը դյուրացնի քաղաքացիների, գործատուների եւ պետության փոխգործակցությունը:
Բժշկական սերտիֆիկացումը, միգրանտների կենսաչափական գրանցումը, նրանց միասնական փաստաթղթի եւ բժշկական ապահովագրության տրամադրումը Ռուսաստանի սահմաններից դուրս կբերվեն՝ մուտքի նոր կանոններին համապատասխան, շարունակել է Գորովոյը: Դրա համար արտերկրում պետք է ենթակառուցվածք ստեղծվի`աշխատողների նախաիմիգրացիոն պատրաստման համար` նրանց մշտական բնակության երկրներում: Ենթադրվում է, որ պոտենցիալ գործատուի ընտրությունը նույնպես այնտեղ կանցկացվի:
Ռուսաստանում արտասահմանցիների գտնվելու վայրը կվերահսկվի, եւ կանխարգելիչ միջոցառումները կկատարելագործվեն, հավելել է Գորովոյը: Միգրանտները Պետական եւ քաղաքային ծառայությունների միասնական պորտալում կամ բջջային հավելվածում իրենց անձնական հաշվի միջոցով կտեղեկացվեն իրենց համար ընդունված որոշումների եւ «որոշակի գործողությունների անհրաժեշտության ու դրանց չկատարման հետեւանքների» մասին:
«Մուտքի ժամանակ արտասահմանցին կընդունի հանդուրժողականության մասին համաձայնագիրը, որի խախտումը կարող է հանգեցնել Ռուսաստանում մնալու իրավունքի կորստի: Նման համաձայնագիրը իրենից ներկայացնում է Ռուսաստանի հասարակության մեջ ընդունված վարքագծի կանոններն ու նորմերը պահպանելու, հասարակական կարգի խախտմանը մասնակցելուց, տեղեկատվության ազատության իրավունքի չարաշահման, ներառյալ` վարկաբեկելու կամ սահմանադրական նշանակություն ունեցող բարոյական եւ այլ արժեքները մերժելու փորձերից զերծ մնալու գրավոր պարտավորություն»,- տեղեկացրել է Գորովոյը:
