Ամերիկյան Facebook ընկերությունը, որին պատկանում են Facebook եւ Instagram սոցցանցերը, պրոֆիլների հաշվառման նոր համակարգ է ներդնում՝ բարելավելու օգտատերերի գաղտնիության կարգավորումները, ինչպես նաեւ՝ գովազդի ոլորտում ավելի մեծ ազատություն ստանալու համար: Այս մասին ընկերությունը հայտնել է իր բլոգում:

Նախկինում Facebook-ը լռելյայն կապում էր օգտատիրոջ՝ երկու սոցցանցերի էջերը, սակայն այժմ դա անելու է միայն այն դեպքում, եթե օգտատերը ցանկանա դա: «Այսուհետ, եթե որեւէ մեկի Facebook-ի եւ Instagram-ի էջերը միմյանց հետ կապված չեն էջերի կենտրոնում, մենք գովազդը պլանավորելիս եւ գնահատելիս այս էջերը երկու տարբեր մարդկանց պատկանող էջեր կհամարենք»,- ասվում է հաղորդագրության մեջ:

Ըստ ընկերության՝ այս մոտեցումը թույլ կտա գովազդատուներին ավելի ճկուն լինել իրենց շուկայավարման ռազմավարության մեջ: Ակնկալվում է, որ փոփոխությունը կգործարկվի մի քանի շաբաթից: