Աշխարհը կարող է հայտնվել աղետալի իրավիճակում, եթե համաշխարհային առաջնորդները ՄԱԿ-ի կլիմայի հարցերով գագաթնաժողովում չկարողանան պատշաճ կերպով անդրադառնալ ջերմոցային գազերի արտանետումների խնդրին: Այս մասին Observer-ի հետ հարցազրույցում ասել է ՄԱԿ-ի Կլիմայի փոփոխության շրջանակային կոնվենցիայի գործադիր քարտուղար Պատրիսիա Էսպինոզան։
«Մենք իսկապես խոսում ենք երկրների կայունության պահպանման, երկար տարիների ընթացքում մեր ստեղծած ինստիտուտների պահպանման, լավագույն նպատակների պահպանման մասին։ Աղետալի սցենար կլինի, եթե տեղահանվածների զանգվածային հոսքեր ունենանք», - հայտարարել է նա։
Նրա խոսքով՝ հետեւանքներն էլ ավելի լուրջ են լինելու: «Դա կնշանակի ավելի քիչ պարենամթերք, ինչը նշանակում է, որ հավանական է պարենային անվտանգության ճգնաժամ: Խոսքը միայն շրջակա միջավայրի պաշտպանության մասին չէ: Սա վերաբերում է նաեւ մեր կառուցած ողջ համակարգին:
Ակնկալվում է, որ Գլազգոյում COP26 գագաթնաժողովին համաշխարհային առաջնորդները ձգտելու են հասնել 2015 թվականի Փարիզի համաձայնագրով սահմանված նպատակներին, որի նպատակն է նախաարդյունաբերական մակարդակի համեմատ նվազեցնել գլոբալ տաքացումը 1.5 աստիճան Ցելսիուսով:
2015 թվականի համաձայնագիրը ստորագրողներից պահանջվում է մշակել կլիմայական ճգնաժամի դեմ պայքարի ավելի ու ավելի ագրեսիվ ծրագրեր եւ հինգ տարին մեկ անգամ նպատակներ ներկայացնել համաշխարհային հարթակում. գործընթաց, որը, ըստ Էսպինոզայի, կարող է դժվար լինել որոշ երկրների համար:
