Մեքսիկայի հարավում գտնվող Չիապաս նահանգում անհայտ անձը կրակել է հայտնի լրագրողի վրա, հայտնում է «ՌԻԱ Նովոստի»-ն՝ վկայակոչելով Heraldo de Chiapas-ի տեղական խմբագրությանը։

Հաղորդվում է, որ 62-ամյա Ֆրեդի Լոպես Արեւալոն հինգշաբթի երեկոյան վերադարձել է տուն՝ Սան Կրիստոբալ դե լաս Կասաս համայնքում՝ մեկ այլ քաղաք ուղեւորությունից հետո: Երբ լրագրողը բեռնախցիկից իրեր է հանել, հանցագործը հրազենով մահացու վիրավորել է նրան, ապա` անհետացել մոտոցիկլետով։

Լոպես Արեւալոն որպես թղթակից աշխատել է տարբեր արտասահմանյան գործակալություններում, ինչպես նաեւ խմբագիր է եղել Novedades de México, Prensa Libre de Guatemala եւ Notimex տեղական պարբերականներում: Իր կարիերայի ընթացքում նա լուսաբանել է զինված հակամարտությունները ինչպես երկրի ներսում, այնպես էլ արտերկրում, հաղորդում է Associated Press-ը:

Լրագրողը տարածաշրջանային Maya Press գործակալության հիմնադիրն էր, որն ընթերցողներին իսպաներեն, անգլերեն եւ ֆրանսերեն լեզուներով տեղեկացնում էր Չիապաս նահանգում տեղի ունեցող իրադարձությունների մասին։

Մարդու իրավունքների, բնակչության եւ միգրացիայի հարցերով փոխնախարար Ալեխանդրո Էնսինասը ավելի վաղ հայտնել էր, որ երեք տարվա ընթացքում Մեքսիկայում սպանվել է 47 լրագրող։