Գուանտանամոյի բանտում գտնվող ամերիկացի բանտարկյալ Մաջիդ Խանը, որը մեղադրվում է Ալ-Քաիդա խմբավորմանն աջակցելու մեջ, առաջին անգամ խոսել է հարցաքննությունների ժամանակ ԱՄՆ ԿՀՎ-ի հետախույզների դաժան խոշտանգումների եւ բռնությունների մասին, գրում է «Լենտա»-ն` վկայակոչելով Associated Press-ը:
Բանտարկյալը երդվյալ ատենակալների դատարանին պատմել է, որ ինքը երկար ժամանակ բռնության է ենթարկվել ԿՀՎ ստորգետնյա օբյեկտներում՝ այսպես կոչված «սեւ կետերում» (black site)` չնայած հետաքննության հետ համագործակցելու պատրաստակամությանը: Խանը պարզաբանել է, որ իրեն մի քանի օր մերկ կախել են առաստաղից, սառը ջուր են լցրել նրա վրա եւ թույլ չեն տվել քնել, սովամահ են արել եւ գլուխը ջրի տակ պահել՝ բանտարկյալին խեղդելու համար, ինչպես նաեւ ծեծի և բռնաբարության են ենթարկել:
«Կարծում էի, որ կմեռնեմ։ Ես աղաչում էի նրանց կանգ առնել եւ երդվում, որ ոչինչ չգիտեմ։ Որքան շատ էի համագործակցում եւ խոսում, այնքան ավելի շատ էի խոշտանգում ինձ»,- պատմել է Գուանտանամոյի բանտարկյալներից մեկը: Գործակալությունը պարզաբանել է, որ սա առաջին դեպքն է, երբ առանձնապես կարեւոր բանտարկյալը հնարավորություն է ստացել խոսել հարցաքննության մեթոդների մասին։
Նա մոտ երեք տարի անցկացրել է ԿՀՎ գաղտնի հաստատություններում մինչեւ 2006 թվականի սեպտեմբերին Գուանտանամո ուղարկելը: Բանտարկյալը պարզաբանել է, որ այս ամբողջ ընթացքում լույս չի տեսել եւ բացի պահակներից ու քննիչներից ոչ մեկի հետ չի շփվել։
41-ամյա Խանը խոստովանել է, որ Ալ-Քաիդայի առաքիչն էր եւ ներգրավված էր մի քանի դավադրությունների ծրագրման մեջ, որոնք այդպես էլ չեն իրագործվոլ: 2012 թվականի փետրվարին նա իրեն մեղավոր է ճանաչել մեղադրանքներով, այդ թվում` դավադրության, սպանության եւ ահաբեկչությանը նյութական աջակցություն ցուցաբերելու համար:
Սպասվում է, որ տղամարդը կդատապարտվի 25-ից 40 տարվա ազատազրկման։ Հետաքննության հետ համագործակցության համար նրա պատժաչափը կկրճատվի, հաշվի կառնվի նաեւ 2012 թվականից բանտում անցկացրած ժամանակը։