Հռոմի պապ Ֆրանցիսկոսը սրբադասել է հոլանդացի քահանա, գիտնական եւ լրագրող Տիտուս Բրանդսմին, ով սպանվել է 1942 թվականին Դախաուի համակենտրոնացման ճամբարում՝ նացիստների դեմ քարոզի համար, հայտնել է Վատիկանը, փոխանցել է Reuters-ը։
Բրանդսմը, ով կարմելիտների օրդենի անդամ էր եւ ծառայում էր որպես Նայմեգենի Կաթոլիկ համալսարանի նախագահ, սկսեց հակադրվել նացիստական գաղափարախոսությանը դեռեւս Երկրորդ համաշխարհային պատերազմից եւ 1940 թվականին Գերմանիայի՝ Նիդեռլանդներ ներխուժումից առաջ:
Նացիստական օկուպացիայի ժամանակ նա դեմ էր հանդես գալիս հակահրեական օրենքներին։ Որպես Նիդեռլանդների կաթոլիկ թերթերի խորհրդական՝ նա հորդորեց խմբագիրներին չհրապարակել նացիստական քարոզչությունը:
Բրանդսմը ձերբակալվել է 1942 թվականին եւ պահվել հոլանդական բանտերում, այնուհետեւ տեղափոխվել է Մյունխենի մոտ գտնվող Դախաու, որտեղ նրան ենթարկել են կենսաբանական փորձարկումների եւ սպանել մահացու ներարկումով նույն թվականին՝ 61 տարեկան հասակում։
Հռոմեական կաթոլիկ եկեղեցին սովորեցնում է, որ միայն Աստված է հրաշքներ գործում, սակայն այն սրբերը, որոնք Աստծո հետ երկնքում են, բարեխոսում են մարդկանց համար, ովքեր աղոթում են իրենց:
Հրաշքները բժշկական տեսանկյունից անբացատրելի բուժում են: Հրաշքի մանրամասները չեն բացահայտվել, իսկ սրբադասման արարողության օրը չի նշանակվել:
Նացիստական համակենտրոնացման ճամբարներում սպանված մի քանի այլ կաթոլիկներ արդեն սրբադասվել են։ Նրանց թվում են լեհ քահանա Մաքսիմիլիան Կոլբեն եւ գերմանացի միանձնուհի քույր Էդիթ Շտայնը։ Երկուսն էլ սպանվել են նացիստների կողմից օկուպացված Լեհաստանի Օսվենցիմ ճամբարում:
