Սամվել Բաբայանն, ըստ էության, հաղորդում է տվել հանցագործության մասին։ Այս մասին, այսօր՝ դեկտեմբերի 9-ին, Աժ-ում լրագրողների հետ զրույցում նշեց «Պատիվ ունեմ» խմբակցության պատգամավոր Տիգրան Աբրահամյանը՝ անդրադառնալով ՊՆ-ում պատերազմին վերաբերող փաստաթղթերի, հրամանների կեղծման մասին Արցախ ԱԽ նախկին քարտուղար Սամվել Բաբայանի հայտարարություններըին:

«Ակնհայտ է, որ ԶՈՒ ԳՇ-ում, բանակում կամ անվտանգության մյուս կառույցներում նման կեղծումների, խմբագրումների հնարավորություն ունի միայն իշխանությունը, նաև ակնհայտ է, որ սրա հասցեատերն իշխանությունն է։

Ստացվում է, որ իշխանությունը, 44-օրյա պատերազմի վերաբերյալ հանձնաժողով ստեղծելուց կամ 44-օրյա պատերազմի վերաբերյալ քրգործեր հարուցելուց առաջ, փաստորեն, փորձում է վերախմբագրել կամ սրբագրել որոշումներ, հրամաններ, ինչի նպատակն է այդ իրադարձությունների գլխավոր պատասխանատվությունը փորձել բարդել ԶՈՒ-ի վրա, տարբեր օղակների վրա, կոնկրետ նախկին և ներկա զինվորականների վրա, փախչել պատասխանատվությունից, ցույց տալ՝ իբրև ինչ մեղք ուներ «խեղճ» իշխանությունը։ ԶՈՒ-ում թիրախներ են նշանակում, որոնց վրա հետագայում ջարդվելու են գործեր»,- ընդգծեց Աբրահամյանը։