Ադրբեջանցի շուրջ 30 ընդդիմադիր լրագրողները բողոքում են մեդիայի մասին ռեպրեսիվ օրենքի դեմ։ Նրանք բողոքի ցույց են անցկացրել Ադրբեջանի խորհրդարանի շենքի դիմաց։
Ըստ Turan-ի՝ նրանք դժգոհություն են հայտնել «Մեդիայի մասին» օրենքի նախագծի վերաբերյալ, որը սահմանափակում է մամուլի իրավունքներն ու խոսքի ազատությունը։ Բողոքի ակցիայի մասնակիցներն իրենց վրդովմունքն են հայտնել առ այն, որ խորհրդարանը անտեսում է օրինագծում փոփոխություններ կատարելու լրագրողական համայնքի կոչերն ու պահանջները։ «Մենք դեմ ենք ռեակցիոն օրենքին», «Մամուլն ազատ է», «Վերցրու գրանցամատյանն ու հեռացիր», վանկարկել են նրանք։
Լրագրողները բանաձեւ են կարդացել, որով պատգամավորներից պահանջել են հաշվի առնել լրագրողական հանրության կարծիքը եւ անհրաժեշտ լրացումներ կատարել օրինագծում։ «Այս օրենքը հակասում է Ադրբեջանի Սահմանադրությանը եւ Մարդու իրավունքների եվրոպական կոնվենցիային։ Եթե մեր կարծիքը հաշվի չառնվի՝ լրագրողները կանտեսեն այս ռեակցիոն օրենքը»,- ասվում է բանաձեւում։