ՀՀ նախագահն ավելի շատ լիազորություններ ունի, քան օմբուդսմենը՝ թե՛ Սահմանադրական դատարան դիմելու, թե՛ այլ գործիքների առումով, բայց չցանկացավ դրանք իրականացնել։ Այս մասին հունվարի 24-ին NEWS.am-ի թղթակցի հետ զրույցում ասաց «Հայաստան» խմբակցության պատգամավոր Արամ Վարդեւանյանը։
Նրա խոսքով՝ պատասխանատվությունից խուսափելու ձգտման զգացողություն կար, այդ թվում՝ ապագա հնարավոր մարտահրավերների հետ կապված։
«Արման Թաթոյանը ցույց տվեց, թե օմբուդսմենը որքան արդյունավետ կարող է լինել իր ունեցած լիազորություններով։ Նախագահը մի քանի անգամ դիմել է Սահմանադրական դատարան, եւ դրանց մի մասը բավարարվել է։ Պատկերացրեք, եթե նա ավելի հաճախ դիմեր, ինչպես անում են օմբուդսմենն ու խորհրդարանական ընդդիմությունը։ Մենք որակապես այլ պատկեր կունենայինք, եթե նախագահն օգտագործեր իր հնարավորությունները հայտարարություններ ու հաղորդագրություններ տարածելու, խորհրդարանի նիստերին մասնակցելու իրավունքը։ Դրանցից ոչ մեկը չի արվել»,- ասաց Վարդեւանյանը։
Նա նշեց, որ Արմեն Սարգսյանն իր հայտարարության մեջ նշում է նաեւ, որ երկիրը կանգնած է շատ բարդ մարտահրավերների առաջ՝ մատնանշելով, որ գործող իշխանությունները չցանկացան կառավարման խորհրդարանական համակարգի ձեւից անցնել դրա բովանդակությանը։
«Հասկանալի է, թե ինչու չեն ցանկացել. իշխող ուժի համար անընդունելի են զսպումների, հակակշիռների, իշխանությունների տարանջատման սահմանադրական սկզբունքները»,- ասաց պատգամավորը։
Նա հիշեցրեց, որ հրաժարականի գործընթացին նախորդեց Սարգսյանի կարճատեւ արձակուրդը՝ առողջական պատճառներով։
«Այնուամենայնիվ, այն, որ երկրի նախագահը հրաժարական է տալիս՝ գտնվելով երկրից դուրս, պետության համար այնքան էլ դրական հանգամանք չէ պետական ինստիտուտների տեղի ու դերի առումով»,- կարծում է Վարդեւանյանը։
Պատգամավորը պարզաբանեց, որ նախագահի թեկնածուի քվեարկությանը պատգամավորների բարձր մասնակցության սկզբունքը (3/4) հստակ տրամաբանություն է նախատեսում, որպեսզի նա ընտրվի համազգային կոնսենսուսի կամ գոնե փոխզիջման արդյունքում։ Հակառակ դեպքում նախագահը լեգիտիմության հետ կապված խնդիրներ կունենա։
«Եթե նախագահն ընտրվի երկրորդ փուլով, ապա այսօրվա պայմաններում դա նշանակում է, որ նա մեկ ուժի նախագահ է լինելու։ Նույնը վերաբերում է օմբուդսմենին: Ստեղծվում է մի իրավիճակ, որը բավականին լուրջ հակասության մեջ է մտնում ժողովրդավարության հետ։
ԱԺ խոսնակը նախագահի պարտականությունները կսկսի կատարել 7 օրից։ Այս ընթացքում երկրի նախագահը կլինի Արմեն Սարգսյանը։ Ալեն Սիմոնյանն իր պարտականությունների ընթացքում Հայաստանի նախագահի աշխատավարձ չպետք է ստանա, նա չի դադարում ԱԺ խոսնակ լինել:
Այսօրվանից 7 օրից կսկսվի արտահերթ նախագահական ընտրությունների շրջանը։ Սահմանադրությունը չի պատասխանում այն հարցին՝ արդյոք նախագահը կարող է այս 7 օրվա ընթացքում հետ վերցնել իր հայտարարությունը, թե՞ եռօրյա ռեժիմ է գործելու։
Ինչ վերաբերում է ընտրությունների երկրորդ փուլին, ապա ԱԺ կանոնակարգ օրենքում այս մասին ուղիղ կերպով ոչինչ չի ասվում։
Կարծում եմ՝ ընտրությունների առաջին փուլը տեղի կունենա մարտի առաջին կեսին, իսկ երկրորդ փուլը՝ մարտի երկրորդ կեսին։ Եթե նախագահի պաշտոնը թափուր մնալուց ոչ շուտ, քան 25 եւ ոչ ուշ, քան 35 օրվա ընթացքում խորհրդարանի հերթական նիստ նախատեսված չէ, ապա այն անցկացվում է օրենքի ուժով»,- ասաց նա։
Վարդեւանյանը զարմանք հայտնեց, որ վաղը Սահմանադրական դատարանում պետք է խորհրդարանի խոսնակի ընտրության հարցով նիստ տեղի ունենար, սակայն Ազգային ժողովի պահանջով այն հետաձգվեց՝ պատճառաբանելով, որ ընթացակարգը լինելու է բանավոր եւ պատրաստման համար ժամանակ է պետք:
«Խորհրդարանի նախագահն այսօրվա պայմաններում՝ գործող իշխանությունների օրոք, հնարավորություն չունի լիարժեքորեն կատարել նախագահի պարտականությունները, քանի որ խոսքը մի մարդու մասին է, ում լեգիտիմությունը վիճարկվել է Սահմանադրական դատարանում։ Չեմ կարծում, որ խորհրդարանի խոսնակը կարող է օբյեկտիվորեն կատարել ՀՀ նախագահի գործառույթները։ Դա հակասության մեջ է կմտնի իշխող կուսակցության ընդունած օրենքների հետ»,- եզրափակեց նա։
