Ղազախստանի նախագահ Կասիմ-Ժոմարտ Տոկաեւը խոստովանել է, որ ապրումների մեջ է երկրում հունվարին տեղի ունեցած անկարգությունների ժամանակ մեծ թվով զոհավածների պատճառով եւ հավաստիացրել, որ բոլոր մեղավորները պատասխանատվության կենթարկվեն: Այդ մասին Տոկաեւը հայտարարել է Կրեմլում ՌԴ նախագահ Վլադիմիր Պուտինի հետ բանակցությունների ժամանակ։
Տոկաեւը ուշադրություն է հրավիրել այն հանգամանքի վրա, որ «այժմ քննություն է գնում, հայտնվում են առաջին արդյունքները»:
«Ցավոք, շատ զոհեր եղան։ Ես ինքս ապրումների մեջ եմ դրա պատճառով, ցավակցություն եմ հայտնել զոհվածների հարազատներին ու մերձավորներին», - նշել Է Ղազախստանի նախագահը։
Հիշեցնենք, որ հունվարի 7-ին Ղազախստանի նախագահ Կասիմ-Ժոմարտ Տոկաեւն իր նոր ուղերձում հայտարարել էր, որ իրավապահ մարմիններին եւ բանակին հրաման է տվել առանց նախազգուշացման դիմահար կրակ բացել «ահաբեկիչների» վրա։ Ընդ որում, նշենք, որ Ալմաթիում Ղազախստանի առաջնորդի աչքին երեւացել են միանգամից 20 հազար «ահաբեկիչներ», որոնց մասին նա գրառում է կատարել Twitter-ում հունվարի 7-ին, սակայն հունվարի 8-ի երեկոյան այդ գրառումն արդեն անհասանելի է եղել։
Նշենք, որ միայն պաշտոնական տվյալներով՝ հունվարյան իրադարձությունների ժամանակ զոհվել է առնվազն 227 մարդ, ավելի քան հազար մարդ վիրավորվել է։