Եվրախորհրդարանի անդամները Հայաստան են ժամանել աջակցություն ցուցաբերելու նպատակով, սակայն նրանք չեն կարող լուծել հարցերը Երեւանի ու Բաքվի փոխարեն։ Այս մասին փետրվարի 22-ին Երեւանում Եվրանեսթ խորհրդարանական վեհաժողովի իրավական հարցերի, մարդու իրավունքների եւ ժողովրդավարության հարցերով հանձնաժողովի նիստում ասաց Եվրախորհրդարանի պատգամավոր, Էստոնիայի նախկին արտգործնախարար Մարինա Կալյուրանդը։
Նրա խոսքով՝ Եվրախորհրդարանի անդամները Հայաստան են ժամանել կոնկրետ նպատակով։ «Եվրախորհրդարանի անդամները ժամանել են Հայաստան՝ Երեւանին եւ Բաքվին աջակցություն ցուցաբերելու նպատակով։ Բայց մենք չենք կարող Երեւանի եւ Բաքվի փոխարեն լուծել խնդիրները։ Միգուցե, դուք կարող եք մեզ հուշել՝ որտեղ պետք է ուժեղացնենք մեր աշխատանքը: Ասացեք ինձ, խնդրում եմ, եւ մենք կտրամադրենք անհրաժեշտ օգնությունը»,- բացատրեց Կալյուրանդը:
Եվրապատգամավորը կողմերին կոչ արեց զերծ մնալ վիրավորական հայտարարություններից եւ բեւեռացնող հռետորաբանությունից։ Նրա կարծիքով՝ դա չի օգնի եւ չի նպաստի երկխոսության խթանմանը։
Կալյուրանդը մեկնաբանեց նաեւ երկու կողմերի հայտարարությունները։ Խոսքը, մասնավորապես, հայ-ադրբեջանական սահմանի սահմանազատման ու սահմանագծման մասին է։ «Սրանք այն փոքր պրագմատիկ քայլերն են, որոնք մեզ հիմա պետք են։ Դրանք թույլ կտան ամրապնդել փոխադարձ վստահությունն ու հարգանքը։ Դա այն է, ինչ մեզ հիմա պակասում է»,- նշեց պատգամավորը։
Նա հիշեցրեց, որ Եվրախորհրդարանը չի ճանաչել Ղարաբաղում 44-օրյա պատերազմի վերջնական արդյունքները եւ նշեց, որ այդ դիրքորոշումը վերահաստատվել է անցյալ շաբաթ ընդունված բանաձեւում։