Երեւանի դիրքորոշումն այն է, որ Ուկրաինայի հակամարտությունը պետք է լուծվի դիվանագիտական ճանապարհով: Դրա համար անհրաժեշտ է, որպեսզի դիվանագիտական ուղիները պահպանվեն։ Այս մասին Ազգային ժողովում մարտի 1-ին ԵԱՀԿ Խորհրդարանական վեհաժողովում հայկական պատվիրակության անդամների մամուլի ասուլիսի ժամանակ, մեկնաբանելով, թե ինչո՞ւ Երեւանը չաջակցեց Ռուսաստանի դեմ ԵԽ պատժամիջոցներին, հայտարարեց արտաքին հարաբերությունների մշտական խորհրդարանական հանձնաժողովի նախագահ, իշխող «Քաղաքացիական պայմանագիր» կուսակցության պատգամավոր Էդուարդ Աղաջանյանը։
Կապերի խզումը, նրա խոսքով, դիվանագիտական լուծումների զարգացմանը չի նպաստում։ «Հենց այս համատեքստում է Հայաստանը որոշում կայացրել այդպես քվեարկել»,- ասաց Աղաջանյանը։
Նշենք, որ անցյալ շաբաթ Եվրախորհուրդը կասեցրեց Ռուսաստանի ներկայացուցչության իրավունքն այդ կազմակերպությունում։ Ռուսաստանի ներկայացուցչության դադարեցմանը կողմ է քվեարկել 42 պետություն, դեմ է քվեարկել միայն երկու երկիր։ Դա հենց Ռուսաստանն էր, ինչպես նաեւ՝ Հայաստանը։ Թուրքիան ձեռնպահ է մնացել, իսկ Ադրբեջանը չի մասնակցել քվեարկությանը։