Հիմնական թեզը, որով գործող իշխանությունը փորձում է մոլորեցնել մեր հանրությանը, այն է, որ Հայաստանն ի վիճակի չէ նոր պատերազմի մեջ ներգրավվել եւ դիմադրել Ադրբեջանին, ուստի դրանով այս իշխանությունը «խաղաղության դարաշրջան» կոչված կեղծ օրակարգն է բերում առաջ: Այս մասին NEWS.am-ի հետ զրույցում նշեց ԱԺ «Հայաստան» խմբակցության պտգամավոր Վահե Հակոբյանը:
«Պատերազմով վախեցնելով իշխանությունը փորձում է հանրությանը մարսեցնել այդ բոլոր զիջումները, որոնք շարունակական բնույթ է կրում: Ես համոզված եմ, որ մենք հիմա կանգնած ենք ամենամեծ զիջման առաջ: Խոսքն Արցախի մասին է: Միաժամանակ իշխանությունն այդ ամենն օգտագործում է ընդդիմության դեմ: Նաեւ հանրությանն է տրամադրում ընդդիմության դեմ»,-ասաց նա:
Անդրադառնալով վարչապետ Նիկոլ Փաշինյանի՝ կառավարության նիստում արած հայտարարությանը, թե Հայաստանը կանգնած է նոր պատերազմի շեմին, Վահե Հակոբյանն ասաց. «Եթե խոսքը պատերազմի մասին է, ո՞ր տարածքում պատերազմի մասին է: Որտե՞ղ, Արցախո՞ւմ: Եթե այո, ապա դա անհարգալից վերաբերմունք է մեր գլխավոր դաշնակցին՝ ՌԴ-ին: Արցախում տեղակայված են ռուս խաղաղապահները:
Իսկ եթե խոսքը Հայաստանի տարածքի մասին է, այստեղ շատ ավելի խորքային է խնդիրը, քանի որ մենք նույն մեր դաշնակցի հետ ունենք երկու խոշոր պայմանագիր՝ մեկը ուղիղ ՀՀ-ՌԴ ռազմական համագործակցության մասին է, մյուսը ՀԱՊԿ-ի պայմանագիրը: Փոխանակ այդ երկու պայմանագրերը օր առաջ վեևրակենդանացնեն եւ անվտանգային մեխանիզմները այս իշխանությունը փորձի կյանքի կոչել, նոր շունչ տալ, ինքը Արեւմուտքի հետ համահունչ Ռուսաստանին դուրս է մղում գործընթացից»:
Ինչ վերաբերում է ՔՊ-ական պատգամավոր Գուրգեն Արսենյանի հայտարարությանը, ով ԱԺ ամբիոնից կոչ արեց ԱԱԾ-ին զբաղվել ընդդիմությամբ, պարզել, թե ուր են տանում նրանց գործողությունները, որ Արցախ այցելությունը Հայաստանի համար հղի է լուրջ վտանգներով, ընդդիմադիր պատգամավորն արձագանքեց. «Ես համոզված եմ, որ ԱԱԾ-ն արդեն 4 տարի է՝ զբաղվում թե անձամբ ինձնով, թե ընդդիմության ցանկացած գործիչով: Բայց ասելով հո չի՞, այդ կոչ անեողները շատ հեռու պատկերացումներ ունեն ԱԱԾ-ի գործառույթներից ու հնարավորություններից:
Ես համոզված եմ, որ այս իշխանությունը, եթե այս րոպեից սկսած, եթե ադրբեջանական կողմը որեւէ ոտնձգություն կազմակերպի, կասկած չունեմ, որ իրենք հետները ուղիղ կապի մեջ են»:
