Արգենտինայի նախագահ Ալբերտո Ֆերնանդեսն աջակցություն է հայտնել հայ ժողովրդին՝ կապված Հայոց ցեղասպանության 107-րդ տարելիցի հետ:
«1915 թ. ապրիլի 24-ի «կարմիր կիրակի» օսմանյան իշխանությունները դաժան ցեղասպանություն են սկսել հայ ժողովրդի դեմ:
Ավելի քան մեկ միլիոն հայ դարձել է մեծագույն վայրագությունների զոհը: Նրանց տարհանել են եւ ստիպել են քայլել հարյուրավոր կիլոմետրեր անապատային տարածքով: Շատերը դաժանաբար սպանվել են, իսկ մյուսները մահացել են սովից, ծարավից ու կտտանքներից:
Հայոց ցեղասպանությունը դարձել է 20-րդ դարի առաջին «էթնիկ զտումը», որը նշանավորվել է այդ վայրագ իրադարձություններով: Արգենտինան դարձել է տարածաշրջանի այն երկիրը, որն ամենամեծ թվով հայերի է ընդունել սփյուռքում:
Հայոց ցեղասպանության 107-րդ տարելիցին մենք կանգնած ենք զոհերի կողքին՝ նշելով ժողովուրդների միջեւ հարգանքի եւ հանդուրժողականության օրը:
Մեր համերաշխությունն եմ հայտնում հայ ժողովրդին՝ հիշողության պահպանմանն ուղղված պայքարում: Մի՛ մոռացեք: Իմացե՛ք ճշմարտությունը: Պահանջե՛ք արդարությունը», - գրել է նա Twitter-ում:
