Աննխադեպ մեծ թվով ոստիկաններ են կուտակված Երեւանի կենտրոնական փողոցներում, որտեղ քաղաքացիները խաղաղ անհնազանդության ակցիաներ են իրականացնում եւ փողոցներ փակում: ԱԺ «Հայաստան» խմբակցության պատգամավորն եր Արամ Վարդեւանյանի եւ Արթուր Սարգսյանի գլխավորությամբ քաղաքացիները երթով շրջել են քաղաքի փողոցներում, մասնավորապես, Սարյան փողոցում:
Երբ քաղաքացիները փակեցին ճանապարհը, սեւբերետավոր ոստիկանները ուժ կիրառելով, հրմշտելով ու քաշքշելով ազատեցին ճանապարհը:
Նմանատիպ իրավիճակ էր նաեւ Բաղրամյան-Պռոշյան խաչմերուկում, Մոսկովյան-Նալբանդյան խաչմերուկում եւ այլն:
Նշենք, որ այսօր առավոտից Երեւանում կրկին սկսվել են անհնազանդության ակցիաները:
Ավելի վաղ NEWS.am-ը հայտնել էր, որ մայիսի 2-ից խաղաղ անհնազանդության ակցիաներ են սկսվել Երեւանում, փակվել են մի շարք փողոցներ:
Մայիսի 1-ի երեկոյան հանրահավաքից հետո ընդդիմադիր ուժերը վրաններ էին տեղադրել եւ գիշերը մնացել Ֆրանսիայի հրապարակում։ ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանը հանրահավաքի ընթացքում հայտարարել է, որ այսօրվանից անհնազանդության խաղաղ գործողություններ են սկսվելու ամբողջ հանրապետությունով մեկ․ փակվելու են հատկապես մայրաքաղաքի կենտրոնական փողոցները։
Նշենք նաև, որ երեկ առավոտից բողոքի ակցիաների կարգավորման համար ոստիկանությունը առանձնակի բիրտ ուժ է կիրառել. ՊՊԾ գնդի հրամանատարը ոտքով հարվածել է լրագրողին, մեկ այլ լրագրողի ինքնազգացողությունն է վատացել հրմշտոցի ընթացքում, հրապարակված կադրերում երևում են նաև ոստիկանների կողմից ցուցարարների ծեծի դեպքեր: Ժամը 14:00-ի դրությամբ ոստիկանության տարբեր բաժիններ է բերման ենթարկվել շուրջ 250 անձ, եղել են ԱԺ պատգամավորներին բերման ենթարկելու փորձեր: