Ֆինլանդիայի նախկին վարչապետը վստահ է, որ Թուրքիայի հակազդեցությունը Շվեդիայի եւ Ֆինլանդիայի՝ ՆԱՏՕ-ին անդամակցության դեմ «կլուծվի» դիվանագիտական ճանապարհով։
«Վստահ եմ, որ դա կկարգավորվի»,- ասել է Ալեքսանդր Ստաբը CNBC Capital Connection-ին՝ հավելելով, որ ե՛ւ Ֆինլանդիան, ե՛ւ Շվեդիան Թուրքիայի՝ Եվրամիությանն անդամակցության «ուժեղ կողմնակիցներն» են: «Իմ ենթադրությունն այն է, որ առաջիկա մի քանի օրվա ընթացքում ինչ-որ կուլիսային դիվանագիտություն կլինի… իմ փորձից դատելով՝ այդպիսի բաները կարգավորվում են»,- ասել է նա:
Սթաբը նշել է, որ հենց 1999 թ. ԵՄ-ում Ֆինլանդիայի նախագահության ժամանակ բացվեցին ԵՄ-ին Թուրքիայի անդամակցության շուրջ բանակցությունները։ «Դա պատմական պահ էր: Եւ ես վստահ եմ, որ նախագահ Էրդողանը հիշում է դա»,- ասել է նա:
Սթաբը, ով այժմ պրոֆեսոր է եւ Ֆինլանդիայի Եվրոպական համալսարանական ինստիտուտի Անդրազգային կառավարման դպրոցի տնօրենը, Ռուսաստանի արձագանքը որպես «բավական չափավոր» է բնութագրել: «Կարծում եմ՝ պատճառը միանգամայն պարզ է. Ռուսաստանը ՆԱՏՕ-ին Ֆինլանդիայի միանալը որպես ռազմական կամ անվտանգության սպառնալիք չէր դիտարկում»,- ասել է նա: