Հայաստանի հակակոռուպցիոն կոմիտեն պետք է զբաղվի պետական հատվածում կատարված հանցագործություններով: Այս մասին մայիսի 24-ին Ազգային ժողովի նիստին Քրեական դատավարության օրենսգրքում փոփոխություններ եւ լրացումներ կատարելու մասին օրինագծի քննարկման ժամանակ հայտարարեց ՀՀ արդարադատության փոխնախարար Արփինե Սարգսյանը։
Նա, մասնավորապես, նշեց, որ Հակակոռուպցիոն կոմիտեի ձեւավորման ժամանակ կառույցին 40 պաշտոն է հատկացվել։ Դրանցից 33-ը քննիչներ են։ Կոմիտեն, նրա խոսքով, մեծ ծանրաբեռնվածությամբ է աշխատում։ «Միայն 2021 թ. հոկտեմբերի 23-ից դեկտեմբերի 31-ն ընկած ժամանակահատվածում քննվել է 280 քրեական գործ, նախապատրաստվել է 171 նյութ։ Միջին հաշվով յուրաքանչյուր քննիչի վարույթում 10-11 գործ է եղել, ինչը չի կարող չազդել քննության որակի վրա»,- ասաց Սարգսյանը։
Այդպիսի ծանրաբեռնվածությունը, ըստ փոխնախարարի, թույլ չի տալիս արդյունավետ աշխատել, հատկապես՝ պետությանը պատճառված վնասի հետ կապված խոշոր գործերի մասով։ Այս կապակցությամբ Արդարադատության նախարարությունն առաջարկում է Կոմիտեի իրավասության շրջանակներում պահել միայն այն կոռուպցիոն հանցագործությունները, որոնք կատարվել են պաշտոնատար անձանց կողմից։ Այսինքն, ըստ էության, խոսքը պետական հատվածում կոռուպցիայի դեպքերի մասին է։
Ընդ որում, կոմիտեի իրավասության ներքո կմնան ընտրողներին կաշառք տալու, այլ աղբյուրներից, այլ ոչ թե բացառապես այդ նպատակով ստեղծված հատուկ հիմնադրամից, նախընտրական արշավի վրա ծախսերի, ինչպես նաեւ գույքի չհայտարարագրման, կուսակցությունների ապօրինի ֆինանսավորման, ապօրինի դատական ակտերի հետ կապված հանցագործությունները եւ մի շարք այլ հարցեր:
