Հանրային մուլտիպլեքսում գործող հեռուստաալիքները պարտավոր են լուսաբանել ամբողջ Հայաստանի անցուդարձը, նրանք միտինգների քարոզչական ապահովման գործիք չեն ըստ օրենքի: Այս մասին, այսօր՝ հունիսի 7-ին, ԱԺ-ում լրագրողների հետ զրույցում ասաց Հեռուստատեսության եւ ռադիոյի հանձնաժողովի նախագահ Տիգրան Հակոբյանը՝ անդրադառնալով օրեր առաջ Facebook-ի գրառմանը, որտեղ նշել էր, որ հանրային մուլտիպլեքսում գործող երկու հեռուստաընկերություն իրենց եթերային քաղաքականությամբ համառ ջանքեր են գործադրում, որպեսզի իրենց հեռարձակման լիցենզիան առնվազն կասեցվի:
«Եթե ուզում են քարոզչական գործիքներ լինել, կարող են յութուբյան ալիքներ բացել եւ հանգիստ այդ գործը կատարել: Մենք պարտավոր ենք օրենքը պաշտպանել: Տեսեք ինչ տեղեկատվական հոսքեր կան, որոնք ստեղծում են մանիպուլյցիայի, պրոպագանդայի, ուղեղների լվացման մի մեծ մթնոլորտ: Եվ նորմալ էկոլոգիական միջավայրը պահելու համար բոլոր հեռուստաընկերությունները իրենց առաջարկում գրում են, որ պահպանելու ենք բազմակարծությունը, բազմազանությունը, տարբեր տեսակետների լուսաբանումը: Ոչ թե գրել են, որ եթե միտինգ լինի այն քաղաքական ուժի, որին համակրում ենք, մենք շուրջօրյա պետք է լուսաբանենք այդ միտինգները: Եթե լրատվական հաղորդման 90 տոկոսը տրվում է մեկ թեմայի, դա արդեն քարոզչություն է, ոչ թե լրատվություն»,-ընդգծեց Հակոբյանը:
Նա տեղեկացրեց, որ այդ հեռուստաընկերությունները այս տարվա ընթացքում մի քանի նամակ են ստացել ՀՌՀ-ից խնդրանքով, հորդորով, եւ դրանից պետ է հետեւություններ անեին:
«Եթե տարվա մեջ լինում են էթիկայի կանոնների մի քանի խախտումներ, հետո լինում է հայհոյանք, որը դատապարտելի է, կան բռնության կոչեր, կան հեղինակային իրավունքի խախտում: Երբ այդ ամենը հավաքվում է, դա կոչվում է լիցենզիոն պայմանների խախտում: Ես որեւէ հեռուստաընկերության անուն չեմ տվել, եթե ինչ-որ հեռուստաընկերություն իր վրա վերցրել է, նշանակում է զգացել է, որ ինչ-որ խախտումներ արել է: Մենք փորձում են այնպես անել, որ պրոպագանդային բաղադրիչը հանրային մուլտիպլեքսում պակասի»,- ընդգծեց նա: