ԱՊՀ երկրների պաշտպանության նախարարների խորհրդի նիստի մասնակիցները հաստատել են զինված ուժերի 2023 թվականի համատեղ գործունեությունը, հայտնում է Ղազախստանի պաշտպանության նախարարության մամուլի ծառայությունը։
Ուրբաթ օրը Մոսկվայում տեղի է ունեցել ԱՊՀ անդամ երկրների պաշտպանության նախարարների խորհրդի նիստը։ Հանդիպման ընթացքում կողմերը տեղեկություններ են լսել աշխարհում տիրող ռազմաքաղաքական իրավիճակի, Համագործակցության երկրների անվտանգությանը սպառնացող աճող մարտահրավերների ու սպառնալիքների մասին։
«Հաստատվել է մինչեւ 2025 թվականն ընկած ժամանակահատվածում ԱՊՀ անդամ պետությունների զինված ուժերի չափագիտական ապահովման կատարելագործմանն ուղղված համատեղ աշխատանքի ծրագիրը։ Հաստատվել են ԱՊՀ անդամ երկրների զինված ուժերի 2023 թվականի համատեղ միջոցառումները»,- ասվում է հաղորդագրության մեջ։
Պաշտպանության նախարարներն ի գիտություն են ընդունել Համագործակցության զինված ուժերի 2021 թվականի ավիացիոն թռիչքների անվտանգության վիճակի տվյալները։
Քննարկվել են նաեւ ինժեներական զորքերի համար ռազմական անձնակազմի պատրաստման ԱՊՀ անդամ պետությունների բազային կազմակերպության գործունեության հարցերը։