Թուրքիայի նախագահ Ռեջեփ Թայիփ Էրդողանը հույս է հայտնել, որ Ռուսաստանի Դաշնության նախագահ Վլադիմիր Պուտինի եւ Ուկրաինայի նախագահ Վոլոդիմիր Զելենսկու հետ հացահատիկի հարցի շուրջ բանակցություններն արդյունավետ կլինին, հաղորդում է «ՌԻԱ Նովոստի» լրատվական գործակալությունը:
Թուրքիայի ազգային պաշտպանության նախարար Հուլուսի Աքարը հայտնել է, որ սեւծովյան նավահանգիստներից հացահատիկի արտահանման հարցում որոշակի առաջընթաց կա, սակայն կան տեխնիկական հարցեր, որոնք պահանջում են քննարկումներ Ռուսաստանի, Ուկրաինայի եւ ՄԱԿ-ի հետ։ Թուրքիայի արտգործնախարար Մեւլյութ Չավուշօղլուն, իր հերթին, հայտարարել է, որ եթե Մոսկվան եւ Կիեւը պայմանավորվեն հացահատիկի խնդրի շուրջ, Ուկրաինայի ջրերից դուրս «անվտանգության գոտի» կստեղծվի։
«Մեկ շաբաթվա ընթացքում՝ տասը օրվա ընթացքում, մենք բանակցություններ ենք ծրագրում թե՛ պարոն Պուտինի, թե՛ Զելենսկու հետ՝ խնդիրը լուծելու համար։ Պարոն Գուտերեշը նույնպես մտադիր է միանալ այս գործընթացին։ Մենք հույս ունենք արդյունքի հասնել»,- ասել է Էրդողանը Իտալիայի վարչապետ Մարիո Դրագիի հետ համատեղ անցկացված մամուլի ասուլիսի ընթացքում։