Անցած 24 ժամվա ընթացքում ռուսական խաղաղապահ զորախմբի պատասխանատվության գոտում ադրբեջանական զինուժի կողմից հրադադարի պահպանման ռեժիմի երեք խախտում է գրանցվել, հայտնում է ՌԴ ՊՆ-ն։
«Լեռնային Ղարաբաղի զինված կազմավորումների ներկայացուցիչը վիրավորվել է: Ռուս խաղաղապահների հրամանատարությունն ադրբեջանական եւ հայկական կողմերի ներկայացուցիչների հետ համատեղ հանգուցալուծել է իրավիճակը։ Կողմերի շփման գծում փոփոխություններ թույլ չեն տրվել»,- ասվում է հաղորդման մեջ։
Նշվում է, որ ռուսական խաղաղապահ զորախումբը շարունակում է առաջադրանքներ իրականացնել Լեռնային Ղարաբաղի տարածքում։ Քսանյոթ դիտակետերում ռուս խաղաղապահներն իրավիճակի շուրջօրյա դիտարկում են իրականացնում եւ վերահսկում են հրադադարի ռեժիմի պահպանումը։
Պարեկություն է իրականացվել հինգ երթուղիներով՝ Մարտակերտի, Մարտունու, Շուշիի շրջաններում եւ Լաչինի միջանցքում։
Ռուս խաղաղապահների անվտանգության ապահովման եւ հնարավոր միջադեպերի կանխման համար շարունակական փոխգործակցություն է պահպանվում Ադրբեջանի եւ Հայաստանի զինված ուժերի գլխավոր շտաբների հետ։