Հայաստանի Հեռուստատեսության եւ ռադիոյի հանձնաժողովը խախտում է հանրապետության օրենսդրությունը եւ խոչընդոտում անկախ լրատվամիջոցների հեռարձակմանը։ Այս մասին սեպտեմբերի 8-ին մամուլի ասուլիսում հայտարարեց Հայկական երկրորդ հեռուստաալիքի (Հ2) փոխտնօրեն Լեւոն Սուլթանյանը։
ՀՌՀ-ի որոշմամբ Հ2-ը կորցրել է հանրապետության տարածքում հանրային մուլտիպլեքսների շրջանակներում վերգետնյա հեռարձակման իրավունքը։
Սուլթանյանի խոսքով՝ հեռուստաընկերությունն անցել է երեք դատական ատյաններով։ Վերջինս նշել է, որ հեռուստաալիքին արտոնագրից զրկելն անօրինական է։
«Այսինքն՝ հաճախականությունը պետք է մեզ տրվեր, բայց հանձնաժողովը բոլորովին այլ որոշում կայացրեց։ Սա, իմ կարծիքով, միտումնավոր է արվել, որպեսզի երկրում չլինի անկախ հեռուստաալիք, որն օբյեկտիվորեն լուսաբանի երկրում տեղի ունեցող գործընթացները»,-ասաց հեռուստաալիքի ներկայացուցիչը։
Նա նաեւ ասաց, որ հեռուստաընկերությունը մտադիր է մասնակցել մայրաքաղաքում եւ հանրապետական մուլտիպլեքսում հեռարձակման բոլոր մրցույթներին։
