Շվեդիայի նոր կառավարությունն այժմ պետք է լուծի անվտանգության հետ կապված խնդիրները, որոնք Թուրքիան բարձրացրել է ՆԱՏՕ-ին Շվեդիայի եւ Ֆինլանդիայի անդամակցելու հարցում վետոն հանելու դիմաց: Այս մասին հայտարարել է Թուրքիայի արտգործնախարար Մեւլութ Չավուշօղլուն, փոխանցում է Reuters-ը։

Երկու երկրները դիմել են անվտանգության դաշինքին միանալու համար, սակայն բախվել են Թուրքիայի հակազդեցությանը, որը նրանց մեղադրում է Անկարայի նկատմամբ զենքի էմբարգո կիրառելու եւ այն խմբերին աջակցություն ցուցաբերելու համար, որոնք նա համարում է «ահաբեկչական»:

Թուրքիան հունիսին ՆԱՏՕ-ի գագաթաժողովի ժամանակ հանել է իր վետոն՝ այդ հարցում կոնկրետ ձեռքբերում ստանալու դիմաց: Սակայն Անկարան այդ ժամանակվանից հայտարարել է, որ Հյուսիսային Եվրոպայի երկրներն անհրաժեշտ քայլեր չեն ձեռնարկել:

Չավուշօղլուն նշել է, որ Թուրքիան չէր սպասում, որ Շվեդիան որեւէ քայլ կձեռնարկի անցյալ կիրակի կայանալիք ընտրություններից առաջ, սակայն այժմ հաջորդ կառավարությունը պետք է քայլեր ձեռնարկի այդ հարցում։ «Նրանք գիտեն, որ այս համաձայնագրին (Թուրքիայի) խորհրդարանը հավանություն չի տա, քանի դեռ նրանք (քայլեր) չեն ձեռնարկում»,- ասել է նա։

Շվեդական աջակողմյան ընդդիմությունը պահպանում է մի փոքր առավելություն իշխող ձախ կենտրոնամետ դաշինքի նկատմամբ, քանի որ արդյունքները մոտենում են ավարտին:

Չավուշօղլուն ասել է, որ երեք երկրների միջեւ օգոստոսի 26-ին կայացած հանդիպումը ցույց է տվել, որ սկանդինավյան երկրները դեռեւս չեն արձագանքել Թուրքիայի մտահոգություններին։ «Մինչ այսօր կոնկրետ քայլեր չեն ձեռնարկվել»,- ասել է նա։

Երեք երկրները Անկարայի վետոն չեղարկելու համաձայնագիր են ստորագրել՝ ահաբեկչության դեմ պայքարելու խոստումների դիմաց, սակայն Թուրքիան հայտարարել է, որ կարգելափակի անդամակցության դիմումները, եթե խոստումները չկատարվեն: Նա պահանջել է արտահանձնել 73 մարդու Շվեդիայից եւ եւս մեկ տասնյակի՝ Ֆինլանդիայից:

Երեք երկրների պաշտոնյաները օգոստոսին պայմանավորվել են շարունակել հանդիպումները առաջիկա ամիսներին՝ Թուրքիայի մտահոգությունները քննարկելու համար: «Կա համաձայնագիր, եւ այս գործարքի պահանջները պարզ են։ Դրանք պետք է կատարվեն»,- ասել է Չավուշօղլուն։