Չեխիան եւ Լեհաստանը դիմել են Եվրահանձնաժողովին՝ խնդրելով ֆինանսավորում տրամադրել նոր գազատարի համար, որը Չեխիան կմիացնի լեհական ցանցին եւ նրա ՀԲԳ տերմինալներին, հայտնել է Չեխիայի արդյունաբերության նախարարությունը, տեղեկացնում է Reuters-ը։

Ավելի վաղ նրանք միջցանցային Stork II միացումից հրաժարվել էին, սակայն Եվրոպայում էներգետիկ ճգնաժամը եւ ռուսական գազը փոխարինելու փորձերը ստիպել էին երկրներին ակտիվացնել նախագիծը:

Երկու երկրների կառավարությունները կարծում են, որ համատեղ խնդրանքը ավելի լավ հնարավորություն կունենա հավանության արժանանալու ԵՄ REPowerEU հիմնադրամների կողմից, որոնք նախատեսված են ռուսական էներգիայից մայրցամաքի կախվածությանը վերջ դնելու համար:

Նախարարությունը հայտնել է, որ խողովակաշարը, որը Չեխիայի Բեզմերովից կանցնի մինչեւ Լեհաստանի Կենձեժին, աշխատանքը կարող է սկսել 2026 թվականին։

Չեխիային եւ Լեհաստանին ներկայումս կապում է Stork  խողովակաշարը, որն ունի ցածր թողունակություն եւ թույլ է տալիս հոսքեր միայն մեկ ուղղությամբ՝ Չեխիայից Լեհաստան: Չեխական գազ մատակարարները հիմնականում ռուսական գազը գնում են մասնավոր պայմանագրերով, ոչ թե ուղղակի «Գազպրոմ»-ից:

Մատակարարումները հիմնականում իրականացվել են «Հյուսիսային հոսք 1» խողովակաշարով մինչեւ վերջին ամիսների ընթացքում այդ հոսքերի կրճատումն ու հնարավոր դադարեցումը եւ մինչեւ այս շաբաթվա սկզբին խողովակաշարի վնասվելը:

Ներկայում չեխերը գազը ստանում են Նորվեգիայից՝ Գերմանիայի տարածքով, իսկ ՀԲԳ-ն՝ արեւմտաեվրոպական տերմինալներով։