Ռուսաստանն Ուկրաինայի վերաբերյալ Արեւմուտքի հետ բանակցելու առաջարկներ չի ստացել, որոշակիություն առայժմ չկա, պետք է հասկանալ, թե ինչպիսին է լինելու արդյունքը, ասել է ՌԴ նախագահի մամուլի քարտուղար Դմիտրի Պեսկովը։
«Ոչ, չենք ստացել. ոչ մի որոշակիություն այս հաշվով ներկա պահին չկա»,- ասել է Պեսկովը լրագրողներին՝ պատասխանելով այն հարցին, թե արդյոք Կրեմլում դիվանագիտական խողովակներով ազդանշաններ ստացվել են այն մասին, որ Թուրքիայում կարող են տեղի ունենալ բանակցություններ Ռուսաստանի եւ ԱՄՆ-ի, Ֆրանսիայի, Գերմանիայի, Մեծ Բրիտանիայի միջեւ։
Թուրքիայի եւ Եվրամիության միավորված խորհրդարանական կոմիտեի նախագահ Իսմայիլ Էմրահ Քարայելը «ՌԻԱ Նովոստի»-ին տեղեկացրել է, որ Ռուսաստանի եւ Արեւմուտքի չորս երկրների միջեւ բանակցությունների վայր կարող է լինել Ստամբուլը։ Ավելի վաղ հայտնի էր դարձել, որ Թուրքիան նախատեսում է կազմակերպել Ռուսաստանի եւ ԱՄՆ-ի, Ֆրանսիայի, Գերմանիայի ու Մեծ Բրիտանիայի բանակցությունները, համապատասխան առաջարկը հանձնվել է Վաշինգտոնին դիվանագիտական խողովակներով։
