Հուսով եմ, որ Հայաստանը երբեք հարձակողական զենքի կարիք չի ունենա։ Հոկտեմբերի 21-ին Կապանում լրագրողների հետ զրույցում այս մասին ասաց Իրանի գլխավոր հյուպատոս Աբեդին Վարամինը՝ պատասխանելով հարցին, թե արդյոք Հայաստանը դիմել է Իրանին անօդաչու թռչող սարքեր գնելու համար։

Դիվանագետը, մասնավորապես, առաջարկեց այս հարցով դիմել երկու երկրների պաշտպանական գերատեսչություններին։

Մեկնաբանելով Իրանի արտգործնախարար Հոսեյն Ամիր Աբդոլլահիանի խոսքը տարածաշրջանում օտարերկրյա ներկայության անցանկալի լինելու մասին՝ Իրանի գլխավոր հյուպատոսը կրկին վերահասցեագրեց հարցը, բայց այս անգամ անձամբ արտգործնախարարին։ Վարամինը չբացառեց, որ նախարարը նկատի ուներ երրորդ երկրների հնարավոր ռազմական ներկայությունը։

«Մենք միշտ շեշտել ենք, որ տարածաշրջանի երկրները օտարերկրյա զինված ուժերի ներկայության կարիք չունեն»,- ասաց Վարամինը։