Լեհական լրատվամիջոցները հայտնում են երկրի տարածքում երկու հրթիռի ընկնելու մասին, որի հետեւանքով երկու մարդ է զոհվել։ Հաղորդում է լեհական ZET ռադիոն։ Հրթիռներն ընկել են Ուկրաինայի հետ սահմանին գտնվող Լյուբլինի վոյեւոդության Պշեւոդուվ գյուղի մոտ, դրանք հարվածել են հացահատիկի չորանոցին։
Հրշեջ ծառայությունից հաստատել են, որ Պշեւոդուվում պայթյուններ են եղել։ «Միջադեպի պատճառները ներկայումս անհայտ են»,- ասել է պետական հրշեջ ծառայության շրջանային շտաբի մամուլի քարտուղար, ավագ կապիտան Մարցին Լեբեդովիչը: «Մենք ահազանգ ենք ստացել չորացման բակում պայթյունի մասին։ Մենք հաստատում ենք, որ նման բան է տեղի ունեցել։ Երկու հոգի տեղում մահացել են»,- հավելել է նա։
Դեպքի վայրում աշխատում են ոստիկանությունը, դատախազությունը եւ բանակը։ Ոչ պաշտոնական տվյալներով՝ օդ են բարձրացվել ռազմական ինքնաթիռներ։
ZET-ի թղթակից Միխալ Ձենինսկին պարզել է, որ պայթյունները տեղի են ունեցել այն ժամանակ, երբ տրակտորը կանգնել է կշեռքի վրա։
Ճգնաժամային իրավիճակի հետ կապված՝ վարչապետը, նախագահի հետ համաձայնեցնելով, Անվտանգության խորհրդի նիստ է հրավիրել։
