Սանկտ Պետերբուրգում հայերի վրա հարձակված երկու ադրբեջանցիները քննության ու դատավարության ողջ ընթացքում որեւէ զղջում չեն հայտնել։ Այս մասին NEWS.am -ի թղթակցի հետ զրույցում ասաց տուժողների շահերի ներկայացուցիչ, Սանկտ Պետերբուրգի փաստաբանների միջազգային կոլեգիայի փոխնախագահ Զոհրաբ Գաբրիելյանը։
Դատավարության մասին NEWS.am-ը հայտնել էր նախօրեին։
«Գործը վարող դատախազն իր ելույթում նույնպես ընդգծեց, որ, ցավոք, ամբաստանյալները գործի քննության ողջ ընթացքում զղջում չեն հայտնել։ Ապացույցների ամբողջությունը հաստատում է Հաջիեւի եւ Իբիշովի մեղքը։ Դատախազը հատկապես ընդգծեց, որ Իբիշովն ու Հաջիեւը կանխամտածված հանցագործություն են իրականացրել սահմանադրական կարգի հիմքերի եւ պետությկան անվտանգության դեմ։ Նրանց արարքը մեծ հասարակական վտանգ է ներկայացնում, իսկ վերադաստիարակումը հնարավոր է միայն հասարակությունից մեկուսացման պայմաններում»,- ասաց փաստաբանը։ Այս կապակցությամբ դատախազը դատարանին խնդրել է ամբաստանյալներ Իբիշովին եւ Հաջիեւին դատապարտել 5 ու կես տարվա ազատազրկման՝ ընդհանուր ռեժիմի ուղղիչ գաղութում։ Դատարանը վճիռը կհրապարակի դեկտեմբերի 28-ին։
«Սա նախադեպային գործ է՝ հաշվի առնելով այն հոդվածը, որով այն հարուցվել է։ Գործի կարեւորությունը կայանում է նրանում, որ դրանով դատական պրակտիկա է ձեւավորում, քանի որ նախկինում Ռուսաստանի Դաշնության Քրեական օրենսգրքի 282-րդ հոդվածով գործեր չեն հարուցվել։ Պետությունը միշտ փորձել է ընթացք չտալ ազգամիջյան կոնֆլիկտներին՝ այլ ազգային փոքրամասնություններին չսադրելու համար:
Այս իրավիճակում դատախազը համաձայնել է քրեական գործ հարուցել «ծայրահեղականություն» հոդվածով, քանի որ տեղի ունեցածը այդ ասատիճան ընդգծված ծայրահեղական, թշնամական, ստորացուցիչ բնույթ ուներ։ Դատավճիռը շատ կարեւոր է լինելու եւ՛ մեզ՝ հայերիս, եւ՛ իրավակիրառական պրակտիկայի համար»,- շեշտեց Զոհրաբ Գաբրիելյանը։
