Մեծ Բրիտանիայի վարչապետ Ռիշի Սունակը տուգանք կվճարի` տնտեսական օրակարգը խթանող տեսահոլովակ նկարահանելիս ամրագոտին չկրելու համար։

Լանկաշիրի ոստիկանությունը «42-ամյա լոնդոնցի տղամարդուն» տուգանել է մոտ 100 ֆունտ ստերլինգով։ Գործը քննվելու դեպքում տուգանքը կարող է հասնել 500 ֆունտի:

Սունակը այցելել է Լանկաշիր՝ դեպի հյուսիս շրջագայության շրջանակներում տեսահոլովակ նկարահանելու համար:

Instagram-ում հրապարակված տեսանյութում Սունակը նստած է մեքենայի հետեւի նստատեղին եւ քննարկում է, թե ինչպես է կառավարությունը նախատեսում ծախսել իր 2,1 միլիարդ ֆունտ ստերլինգ ֆոնդը, սակայն դիտողները չեն կարողացել չնկատել, որ վարչապետը ամրագոտի չի կապել։

Վարչապետների ներկայացուցիչները BBC-ին հայտնել են, որ Սունակը «լիովին ընդունում է, որ դա սխալ է եղել եւ ներողություն է խնդրել»՝ հավելելով, որ կվճարի տուգանքը։