Հայաստանի կառավարությունն առաջիկայում կհամաձայնեցնի քաղաքաշինական նորմերի վերաբերյալ մոտեցումները։ Մասնավորապես, կորոշվի բնակելի շենքերից գազալցակայանների եւ այլ օբյեկտների թույլատրելի հեռավորությունը։ Այս մասին այսօր՝ փետրվարի 8-ին, Ազգային ժողովի նիստում կառավարության ժամի ընթացքում հայտարարեց ՀՀ վարչապետ Նիկոլ Փաշինյանը՝ պատասխանելով պատգամավորների հարցերին։
Վարչապետի խոսքով՝ Հայաստանում մնացել են դեռեւս 1990-ականներին եւ 2000-ականներին տեղադրված բենզա- եւ գազալցակայաններ։ Դրանք գտնվում են ամբողջ Երեւանում, իսկ երբեմն նաեւ տների կողքին։
«Եթե ողջ խստությամբ հետեւենք անվտանգության պահանջներին, ապա կստացվի, որ օբյեկտների 30-40 տոկոսը պետք է ամբողջությամբ փակվի։ Սրանք բենզալցակայաններն են, հագուստի շուկաները եւ շատ ավելին: Ուստի, նախ պետք է սահմանել ողջամիտ չափանիշներ, երկրորդ հերթին, այդ ամենը թղթի վրա չթողնել»,-ասաց Փաշինյանը։
Նա նշեց, որ առաջիկայում կառավարությունը կմշակի միասնական մոտեցումներ։ «Գազը կամ բենզինը չեն բռնկվի կամ պայթի, եթե պահպանվեն ճիշտ նորմերը։ Ուստի մենք կտեսնենք, թե որտեղ եւ ինչ մոտեցումներ պետք է կիրառել»,-նշեց նա։
