ՌԴ ԱԳՆ պաշտոնական ներկայացուցիչ Մարիա Զախարովան ճեպազրույցի ժամանակ գնահատել է Ջո Բայդենի այցը Կիեւ, հաղորդում է «Московский комсомолец»-ը։
«Բարձրագոչ հայտարարությունների ֆոնին, որ իրենք լիովին վերահսկում են իրավիճակը, հիմա ինչ-որ տեղ հաղթելու են, Բայդենը չհամարձակվեց գնալ Կիեւ՝ առանց Ռուսաստանին նախազգուշացնելու եւ առանց ռուսական կողմին խնդրելու հարգել իր անվտանգությունը»,- ասել է նա։
Վաշինգտոնի աջակցությունը Կիեւին, պարզվեց, «այնքան էլ այն չէր», ասել է դիվանագիտական գերատեսչության ներկայացուցիչը: Ռազմական օգնության նոր փաթեթի հայտարարություններն առավել քան համեստ են ստացվել։
«Ուկրաինական ԶԼՄ-ներում տեղեկություն է հայտնվել այն մասին, որ Ջեք Սալիվանը նախագահ Զելենսկու գրասենյակի ղեկավար Երմակից պահանջել է հաջող հակահարձակում իրականացնել հարավում եւ մոտակա վեց ամսում հասնել Ղրիմի սահմաններին»,- հայտարարել է ՌԴ ԱԳՆ պաշտոնական ներկայացուցիչը։