Ներկայում Իրանի հնարավորություններն այնպիսին են, որ այդ երկիրը կարող է 12 օրում արտադրել նյութ, որն անհրաժեշտ է ատոմային ռումբ ստեղծելու համար, ասել է ԱՄՆ պաշտպանության նախարարի քաղաքական հարցերով տեղակալ Քոլին Քալը։
«2018թ. Իրանին մոտ 12 ամիս պետք կգար տրոհվող նյութերի պաշարներից մեկ ռումբ արտադրելու համար։ Իսկ այժմ 12 օրը կբավականացնի»,- ասել է Քալը Ներկայացուցիչների պալատի զինված ուժերի կոմիտեի լսումներում։
«Այն պահից, երբ մենք դուրս եկանք ԳՀՀԾ-ից, Իրանը պատկառելի առաջընթացի է հասել միջուկային ոլորտում»,- ընդգծել է նա։
Քալն ավելացրել է, որ միջուկային գործարքին վերադառնալը նախկինի պես «բոլոր տարբերակներից լավագույնն է», բայց նշել է, որ ԳՀՀԾ-ի հարցն առայժմ հետաձգվել է։
«Անցած ամռանը մենք ներկայացրել էինք պայմանավորվածությունների առաջարկ, որոնք Իրանը չէր պատրաստվում ընդունել։ Ես չեմ կարծում, թե մենք ԳՀՀԾ-ին վերադառնալու շեմին ենք»,- ասել է նա։
Նախօրեին Bloomberg-ը, հղում կատարելով ԱԷՄԳ-ին, տեղեկացրել էր, որ Իրանում մինչեւ 60 տոկոս մակարդակի հարստացված ուրանի պաշարներն անցած տարվա նոյեմբերից ավելացել են 40 տոկոսով։ Ընդ որում՝ մինչեւ 60 տոկոս հարստացված ուրանի պաշարներն ավելացել են՝ 62,3 կիլոգրամից հասնելով 87,5 կիլոգրամի։