![](img/news/74/86/78/default.jpg)
Վրաստանի ընդդիմությունը նոր բողոքի ակցիա է հայտարարել ընդդեմ «օտարերկրյա գործակալների մասին» օրենքի ընդունման։ Հանրահավաքը տեղի կունենա չորեքշաբթի՝ մարտի 8-ի ցերեկը, Թբիլիսիում խորհրդարանի շենքի դիմաց, լրագրողներին հայտնել է ընդդիմադիր «Աղմաշենեբելիի ռազմավարություն» կուսակցության առաջնորդ Գիորգի Վաշաձեն, հաղորդում է DW-ն։
Նա նաեւ մեղադրել է հատուկ ջոկատայիններին եւ ոստիկանությանը խաղաղ ցուցարարների նկատմամբ անհամաչափ ուժ կիրառելու մեջ։ Ցուցարարները նախօրեին խաղաղ ակցիա իրականացնելով շարժվել էին դեպի Վրաստանի մայրաքաղաքի կենտրոն։ «Ձերբակալվել են բազմաթիվ ցուցարարներ, որոնց թվում է նաեւ ընդդիմադիր «Գիրչի» կուսակցության առաջնորդ Զուրաբ Ջապարիձեն։ Մի քանի ժամից խորհրդարանի դիմացի հրապարակում ավելի շատ մարդ կհավաքվի, քան երեկ»,- ասել է նա։
Վաշաձեն վստահություն է հայտնել, որ «համաշխարհային հանրությունը միանշանակ կդատապարտի Վրաստանի ներկայիս իշխանություններին խաղաղ ակցիան ցրելու համար»։
Հիշեցնենք, որ նախօրեին «օտարերկրյա գործակալների մասին» օրենքի հետ կապված բողոքի ցույցերի ժամանակ Վրաստանի խորհրդարանի մոտ անկարգություններ էին տեղի ունեցել։ Վրաստանի ՆԳՆ-ն հայտնել է 66 մարդու ձերբակալության մասին։