Հայաստանի անվտանգային համակարգը փլուզված է: Այս մասին այսօր՝ մարտի 21-ին, «Հայաստանի անվտանգության փլուզվող համակարգը» թեմայով հրավիրված ասուլիսին ասաց Սթենֆորդի համալսարանի քաղաքագիտության դոտկոր, քաղաքագետ Արթուր Խաչիկյանը։
«Եվ մեր անվտանգության ներուժը, եւ՛ դիվանագիտությունը փլուզված են: Աշխարհում հիմա մեծ փոփոխություններ են տեղի ունենում, մենք շատ արագ գնում ենք դեպի երկրորդ սառը պատերազմ, որը կարող է նաեւ տաք պատերազմ լինել: Աշխարհում երկու բեւեռներ են ստեղծվում: Մեր նման պետությունների համար կա ընտրություն՝ կամ Արեւմուտքի հետ, կամ Ռուսաստանի հետ, կամ ունենալ այնպիսի ներուժ, որ մնալ նեյտրալ: Մենք այդ երեք բանից որեւէ մեկը չարեցինք: Մենք չկարողացանք ոչ Արեւմուտքից ստանալ ռեալ երաշխիքներ, այսինքն՝ տապալվեց մեր արեւմտյան դիվանագիտությունը»,- նշեց Արթուր Խաչիկյանը։
Նա անդրադառնալով հայ-ռուսական հարաբերություններին, նշեց, որ երբեւիցե այդ հարաբերություններն այսպիսի վիճակում չեն եղել:
Խաչիկյանի խոսքով՝ այժմ կա վտանգ, որ Իրանի դեմ կարող են սկսվել օդային հարվածներ, ինչից Ադրբեջանը կարող է պատրվակ ստեղծել եւ հարձակման անցնել Հայաստանի դեմ:
«Այստեղ գնում է Ռուսաստան-Արեւմուտք պայքարը: Մենք հիպնոսի տակ ենք, կարծում ենք՝ մենք այս աշխարհում չենք, ուրիշ մոլորակի վրա ենք ապրում: Չենք հասկանում, որ այստեղից դեպի Թուրքիայի սահման 40 կմ է, այդ տարածքը կարելի է 48 ժամում անցնել»,- ասաց Արթուր Խաչիկյանը։
