Իրանի Իսլամական Հանրապետությունն ընդգծում է հարեւանների հետ հարաբերությունների զարգացումը որպես առաջնահերթություն: Այս մասին, այսօր՝ մարտի 22-ին, Երեւանում լրագրողների հետ զրույցում նշեց Իրանի փոխարտգործնախարար Ալի Բաղերի Քանին:
«Իրանի արտաքին քաղաքականության հարեւանության սկզբունքում իր կարեւոր եւ ուրույն տեղն է զբաղեցնում ինչպես Հայաստանը, այնպես էլ տարածաշրջանում կայունության եւ խաղաղության հաստատումը:
Ես իմ հայ գործընկերոջ հրավերով գտնվում եմ Հայաստանում: Երեկ եւ այսօր մենք շատ արդյունավետ քննարկումներ ենք ունեցել իմ հայ գործընկերոջ, ինչպես նաեւ Հայաստանի ԱԳ նախարարի հետ: Այդ հանդիպումների ընթացքում ընդգծվեց Իրանի կայուն դիրքորոշումը տարածշրջանում խաղաղության ապահովման գործում: Մենք հանդիպումների ընթացքում ընդգծեցինք, որ Իրանը տարածաշրջանում միշտ հաստատուն եւ վստահելի գործընկեր է խաղաղության եւ անվտանգության հաստատման գործում:
Նաեւ մենք ընդգծեցինք, որ տարածաշրջանի երկրներն են, որ խաղաղության եւ կայունության երաշխավորն են, օտարերկրյա ուժերի ներկայությունը չի կարող այդ խաղաղությունն ու կայունությունը ապահովել, նրանք այլ հեռանկարներ են հետապնդում»,-ասաց Իրանի ԱԳ փոխնախարարը:
