Մեզ քննադատում են, ասում են՝ Խորհրդային Հայաստանի սահմաններով պարփակված տարածքը կենսունակ չէ, եւ եթե մենք այդ տարածքը չփոխենք, մենք կենսունակ չենք: Այս մասին այսօր՝ մարտի 22-ին, ԱԺ-ում լրագրողների հետ զրույցում նշեց ԱԺ «Քաղաքացիական պայմանագիր» խմբակցության պատգամավոր Վիգեն Խաչատրյանը:
«Այստեղ մի հետաքրքիր բան կա, եթե այդ տարածքը կենսունակ չէ, այդ անկենսունակ տարածքով ո՞նց ես կենսունակ տարածք ձեռք բերելու: Ստացվում է, որ ինչ-որ մեկից նվեր են սպասում: Այսինքն մարդ կա, մտածում է՝ մի օր Թուրքիան կփլուզվի, մի օր Ռուսաստանը կջղայնանա, առաջ կգնա: Մենք այդ գաղափարախոսության կրողը չենք, մենք սպասարկում ենք կոնկրետ ապրող քաղաքացիների եւ Արցախի ժողովրդի շահերը: Մեր նպատակն է այնպես վարվել, որ Արցախը չհայաթափվի: Այսօր ռեալ վտանգն այդտեղ է: Այսօր ոչ թե խնդիրը դրված է, որ Արցախը ճանաչվի որպես անկախ պետություն: Ես շատ կուզեմ, որ ճանաչվի, տեսնում ենք՝ հարցն արձագանք չի գտնում, մենք էլ չենք կարող անկախացնել»,-ասաց նա:
ՔՊ-ական պատգամավորը շարունակեց, որ կա նաեւ տեսակետ, որ եթե մեր հարաբերությունները զարգացնենք Իրանի եւ Ռուսաստանի հետ, մենք Ադրբեջանին կհաղթենք. «Մենք այդ տեսակետին չենք: Մենք ասում ենք՝ պետք է համագործակցությունը ընդլայնենք, որեւէ մեկի հետ մեր ապագան չկապենք եւ մեր ժողովրդին չխաբենք, հույսեր չտանք»:
