Բելառուսի արտաքին գործերի նախարարությունում հայտարարել են, որ հանրապետության տարածքում ռուսական միջուկային զենքի տեղակայումը չի հակասում Միջուկային զենքի չտարածման պայմանագրի (ՄԶՉՊ)  դրույթներին:

Գերատեսչությունում ընդգծել են, որ Բելառուսի եւ Ռուսաստանի համագործակցությունն իրականացվում է միջազգային իրավունքին խիստ համապատասխան: 

Նախարարությունում նաեւ նշել են, որ նման իրավիճակը «նորություն» չէ, քանի որ ՆԱՏՕ-ում երկար տարիներ գոյություն ունի «համատեղ միջուկային առաքելությունների» պրակտիկա: Դաշինքի ինքնաթիռները սերտիֆիկացված են միջուկային զենքով թռիչքների համար, ՆԱՏՕ-ի անդամ եվրոպական երկրների տարածքներում պահվում են ավելի քան 150 միավոր ԱՄՆ մարտավարական միջուկային զենք եւ այլն:

Մարտի 25-ին Ռուսաստանի նախագահ Վլադիմիր Պուտինը հայտարարել է, որ 2023 թվականի հուլիսի 1-ին կավարտվի Բելառուսում մարտավարական միջուկային զենքի պահեստարանի շինարարությունը։ ՌԴ նախագահն ընդգծել է, որ Մոսկվան Մինսկին միջուկային զենք չի փոխանցում, այլ անում է այն, ինչ արել է Միացյալ Նահանգները տասնամյակներ շարունակ։