Հունաստանի ոստիկանությունը երեքշաբթի օրը հայտնել է, որ ձերբակալել է ահաբեկչության մեջ երկու կասկածվողի, որոնք հարձակումներ են ծրագրել երկրում, հաղորդում է Associated Press-ը:
Կասկածյալները ենթադրաբար օտարերկրյա ահաբեկչական ցանցի անդամներ են եղել: Իշխանությունների տվյալներով՝ նրանք պահվում են Աթենքի կենտրոնում գտնվող ոստիկանության գլխավոր բաժանմունքում։
Ոստիկանության հաղորդագրության համաձայն՝ ձերբակալությանը մասնակցել են Հունաստանի ոստիկանության ահաբեկչության դեմ պայքարի բաժինը եւ Ազգային հետախուզական ծառայությունը, որոնց օգնել է անանուն օտարերկրյա հետախուզական ծառայությունը։
Ոստիկանությունը հայտնել է, որ կասկածյալներն ընտրել են «բարձր սիմվոլիկայով» թիրախ եւ ավարտել են հարձակման նախապատրաստությունը:
«Նրանց նպատակը եղել է ոչ միայն անմեղ քաղաքացիների մահվան պատճառ դառնալը, այլեւ երկրում անվտանգության զգացումը խաթարելը` միաժամանակ վնասելով պետական կառույցներին եւ սպառնալով միջազգային հարաբերություններին»,- ասվում է ոստիկանության հաղորդագրության մեջ։
