Թուրքիայի ընդդիմությունը չի կարողացել նախագահի միասնական թեկնածուի ընտրության շուրջ համաձայնության գալ, գրում է Hürriyet-ը։ Հանդիպման ժամանակ Memleket կուսակցության առաջնորդ Մուհարեմ Ինջեն հրաժարվել է հանել իր թեկնածությունը՝ հօգուտ ընդդիմադիր «Ժողովրդական դաշինքից» Քեմալ Քըլըչդարօղլուի։
Նախագահական ընտրություններին մասնակցելու իրավունք ունի 4 թեկնածու։ Երկուշաբթի օրը ավարտվել է արտախորհրդարանական կուսակցությունների կողմից առաջադրված նախագահի թեկնածու դառնալ ցանկացողների համար ստորագրահավաքի ժամկետը: Միայն երկուսին է հաջողվել հավաքել անհրաժեշտ 100 հազար ձայները՝ Ինջեին եւ Ata դաշինքի թեկնածու Սինան Օհանին։ Ընդդիմադիր ակտիվիստներից շատերը կոչ են անում Ինջեին հանել իր թեկնածությունը ընտրություններից՝ համարելով, որ նա կխանգարի Քըլըչդարօղլուին հաղթանակ տանել առաջին փուլում։
«Հանդիպումը շարունակվել է մեկ ժամ։ Ինջեն հայտարարել է, որ չի հանում իր թեկնածությունը նախագահական ընտրություններից: Դա ցույց է տալիս, որ երկու առաջնորդներն էլ պահպանել են իրենց դիրքերը»,-գրում է թերթը։
Ինջեն մասնակցել է 2018 թվականի ընտրություններին որպես ընդդիմադիր Ժողովրդահանրապետական կուսակցության (CHP) թեկնածու եւ ստացել ձայների ավելի քան 30 տոկոսը, սակայն հետագայում առանձնացել է CHP-ից եւ ստեղծել իր Memleket կուսակցությունը։
Թուրքիայում նախագահական եւ խորհրդարանական ընտրությունները նախատեսված են մայիսի 14-ին:
