ՀՀ վարչապետ Նիկոլ Փաշինյանն այսօր ընդունել է Ռուսաստանի Դաշնության փոխվարչապետ Ալեքսեյ Օվերչուկին: Այս մասին NEWS.am-ը տեղեկանում է վարչապետի աշխատակազմից: Հանդիպմանը մասնակցել է նաեւ ՀՀ փոխվարչապետ Մհեր Գրիգորյանը:
«Գոհունակությամբ պետք է նշեմ, որ Հայաստանի Հանրապետության եւ Ռուսաստանի Դաշնության ներկայացուցիչների միջեւ շփումների բարձր ինտենսիվություն ունենք, եւ չնայած դրան՝ առավել դինամիկ շփումների կարիք կա, քանի որ մեր օրակարգն այնքան հագեցած է, որ ոչ միշտ է հաջողվում սպառել բոլոր հարցերը»,–ասել է Փաշինյանը:
Նա վստահեցրել է, որ կքննարկեն հարցերի բավական լայն շրջանակ՝ տնտեսական եւ քաղաքական հարցեր, տարածաշրջանային եւ միջազգային իրավիճակին վերաբերող հարցեր:
Ռուսաստանի փոխվարչապետն իր հերթին ընդգծել է Ռուսաստանի Դաշնության եւ Հայաստանի Հանրապետության փոխհարաբերությունների ռազմավարական բնույթը: «Իհարկե, այդ հարաբերությունները մեկ անգամ չէ, որ բախվել են տարբեր մարտահրավերների՝ ներառյալ տնտեսական ճգնաժամերը, գլոբալ առեւտրատնտեսական համակարգի փոփոխությունները: Չնայած դրան՝ մենք շարունակում ենք ամրապնդել մեր համագործակցությունը տնտեսական ոլորտում, եւ նախորդ տարի փոխադարձ առեւտրաշրջանառության աճի շատ լավ ցուցանիշներ ունենք: Ռուսաստանից Հայաստան ներդրումները եւս լավ ընթացքի մեջ են»,–ասել է Օվերչուկը:
Նա նշել է, որ իրապես ուրախանում են այն հաջողություններով, որ արձանագրում է Հայաստանի տնտեսությունը՝ որպես Եվրասիական տնտեսական միության մեծ տնտեսության մի մաս եւ այն առավելությունները, որ տալիս է միությունը տեսանելի են:
Զրուցակիցները քննարկել են հայ-ռուսական համագործակցության օրակարգին առնչվող հարցեր: Անդրադարձ է եղել առեւտրատնտեսական կապերին եւ փոխադարձ հետաքրքրություն ներկայացնող այլ թեմաների:
